Barria - www.bizkeliza.org
Skip to main content

Alemaniatik bakearen alde

created by Dresdeko ikasleak Durangon bisitan |
|   Komunikazinoa

Alemaniako Dresdeko hamar ikasle Durangon egongo dira datorren zapatura arte –martxoak 26- hartu-emonerako ekitaldian parte hartzeko. Gazteek hainbat jarduera izango dabe bertoko ikasle batzuekin, bonbardaketen ondorenak aztertzeko asmoagaz. Martxoaren 31n gogoratuko da herrian uriguneak bonbardatzeko hegazkintza erabilten aitzindarietako bat izan zan ekintza belikoaren 74. urteurrena. Dresdekoa, 1945ekoa, suntsiketaren eta gerraren ondorio ikaragarrien paradigma lez gogoratzen da. San Jose Jesuitak Ikastetxeak hiru ikasle alemaniar hartuko ditu.

Durangoko udalak herriaren memoria historikoa gordeteko bultzatu dauan ekimen honen bitartez, “bakea, bizikidetasuna eta kulturartekotasuna lako balioak landu gura dira”. ‘Etorkizuna eraikitzen. Construyendo futuro’ ekimenaren bitartez, partaideek jarduera belikoen ondorenak aztertuko dabez era didaktikoan.

San Jose Jesuitak ikastetxea orain dala hiru ekitaldi hasi zan egitasmoan parte hartzen. Durangoko ikasleak datorren urtean joango dira Dresdera.

Gotzon Gómez egitasmoan parte hartzen daben bigarren zikloko ikasleen koordinatzaileak hartu-emon honen abantailak komentatzen ditu. Ideia bat dator ikastetxe erlijiosoaren ideario eta misinoagaz “urtean zehar beste ekimen batzuk be egiten diralako bakea bultzatzeko”. San Inazioren astea edo elikagaien Gabonetako kanpaina ikastetxean onarpen zabala daukien proposamenak dira.

Aste solidarioa

Durangoko jesuiten ikastetxeak ‘aste solidarioa’ antolatu dau. Datorren astean, beste errealidade eta bizipen batzuk ezagutzera emongo dabez ikasleek “daukiena ezagutu eta baloratu daien”.