SALMOAK 1 Antifona Urtean zehar: Bidal iezadazu, Jauna, zure argia eta zure egia. Pazko aldian: Sion mendira hurbildu zarete, Jaungoiko biziaren hirira, alleluia. 42 Salmoa Jauretxerako grina Ni argi bezala etorri naiz mundura (Jn 12, 46) Egidazu auzi, Jainko, zaindu nire auzia bihotz gabeko jendeagandik, begira nazazu gizon maltzur eta makurragandik. Jainko, nire babesa baitzara Zu: zergatik haizatu nauzu? Eta zergatik goibel nabil, etsaiak zapaltzen nauelarik? Bidal zure argia eta zure egia, hauek eraman nazaten, zure mendi santura, zure jauretxolara, sar nazaten. Eta sartuko naiz Jainkoaren aldarera, poz eta atsegin dudan Jainkoagana, kitaraz goretsiko zaitut, Jauna, ene Jainkoa. Zergatik zaude, ene anima, lur jorik? Zergatik, ezin egonik? Itxaron Jainkoagan, berriz ere Hura baitut goretsiko, nire aurpegiaren salbamen eta nire Jainko. Urtean zehar: Ant. Bidal iezadazu, Jauna, zure argia eta zure egia. Pazko aldian: Ant. Sion mendira hurbildu zarete, Jaungoiko biziaren hirira, alleluia. 2 Antifona Urtean zehar: Zain gaitzazu, Jauna, gure bizitzako egun guztietan. Pazko aldian: Zuk gorde duzu, Jauna, herio-zulotik nire bizia, alleluia. Kantika: Is 38, 10-14. 17-20 Herio-etsipenean larri, eta sendaturik lasai Ni naiz hila izan nintzena, eta ikusten duzu, orain bizirik nago... eta Nik dauzkat heriotzaren giltzak (Apk 1, 17-18) Honela nion: «Joan beharrean naiz nire egunen erdian; Leizeko ateetan utziko naute gelditzen zaizkidan urteetan». Honela nion: «Ez dut gehiago Jauna ikusiko bizien lurrean, ez dut gehiago gizonik ikusiko lurtarren artean. Erauzi eta kendu didate bizilekua, artzainen oihal-etxola bezala; ehuleek bezala hariltzen nuen nire bizia, eta ebaki egin didazu haria». Gau eta egun suntsitzen nauzu, goizerarte oihuka naukazu. Lehoi batek bezala, hezur guztiak xehatzen dizkidazu. Txioka ari naiz enara bezala, urrumaka usoa bezala; ahultzen zaizkit begiok gora begira; Jauna, larri naiz, hel zakizkidan!» Hara, osasun bihurtu da nire gaitza, Zuk gorde baituzu herio-zulotik nire bizia, zure atzera jaurti dituzu nire hoben guztiak. Ez zaitu, noski, Leizeak eskertzen, ez Heriotzak goresten, zulora doazenek ez dute zure leialtasuna itxaroten. Bizidunak, bizidunak bakarrik eskertzen zaitu, nik orain bezala; aitak adierazten die semeei zure leialtasuna. Zatozkit, Jauna, salbatzera, eta joko dugu soinua, Jaunaren etxean, bizi garen egun guztietan. Urtean zehar: Ant. Zaindu gaitzazu, Jauna, gure bizitzako egun guztietan. Pazko aldian: Ant. Zuk gorde duzu, Jauna, herio-zulotik nire bizia, alleluia. 3 Antifona Urtean zehar: Zuri dagokizu, Jainko, goratzarre Sionen. + Pazko aldian: Agertu zatzaizkio gure lurrean, eta oparo aberastu duzu, alleluia. 64 Salmoa Esker oneko otoitza Sion aipatzen denean betiko hiria esan nahi da (Origenes) Zuri dagokizu, Jainko, goratzarre Sionen, + Zuri zin eginak betetzen dituzte. Entzuten baituzu eskaria, Zugana dator hobenengatik gizakia. Gaiztakerien zamapean gaituzu, baina Zuk barkatzen dituzu. Bai dohatsu, Zuk bereizirik hartzen duzuna, zure atarietan daukazuna; ase gaitzala zure etxeko onak, zure jauretxeko santutasunak. Zintzotasun harrigarriz gaituzu entzuten, Jainko, gure Salbatzaile, lur-muga guztien itxarobide, urrungo itsasoen ustepide. Zuk sendotzen dituzu mendiak zure ahal-izatez, gerria jantzirik indarrez. Zuk baretzen duzu itsas orroa uhinen hotsa eta herrien marrua. Zure mirariz lur-bazterrak beldurtzen dituzu, sortalde-sartaldeak mugaz muga pozez bete ohi dituzu. Agertu zatzaizkio lurrean eta euriz beratu duzu, oparo aberastu duzu. Jainko-ibaia urez da betea, eman diezu gari-alea, Zuk atondu baituzu lurra horrela. Urez ase dituzu ildoak, lurrak berdindu, euriz bigundu eta erne muinak bedeinkatu. Zure ondasunez burutu duzu urtea, guritasunez jarioka daude zure bideak. Mendiko larreak hor daude guri, eta muinoak atseginez apaindurik. Zelaiak artaldez jantzi dira, ibarrak gariz estali, txaloka eta kantari. Urtean zehar: Ant. Zuri dagokizu, Jainko, goratzarre Sionen. Pazko aldian: Ant. Agertu zatzaizkio gure lurrari, eta oparo aberastu duzu, alleluia. JAINKOAREN HITZA: 1 Ts 5, 4-5 Zuek, senideok, ez zarete ilunpetan bizi, egun horrek lapurrak bezala harrapatzeko zorian; guztiok argiaren eta egunaren seme zarete. Ez gara gauarenak, ez ilunarenak. GALDERANTZUNA R/. Entzun, Jauna, nire oihua; * zure hitzetan dut itxarobidea. Entzun. V/. Egunsentirako banator zure laguntza eskatzera. * Zure hitzetan. Aintza Aitari. Entzun. Benedictus, ant. Gorroto gaituzten guztien eskutik atera gaitzazu, Jauna. ESKARIAK Bedeinka dezagun Jesus Jauna, bere piztueraz mundua argitu duen gure Salbatzailea; eta esan diezaiogun: Zain gaitzazu, Jauna zure bideetan. Jesus Jauna, zure piztuera oroitzen dugu, goizeko otoitz honetan: - zure aintzaren itxaropenak argi dezala gure egun guztia. Har itzazu, Jauna, egun honetako gure gogo eta asmoak, - hauek baitira gure lehenengo eskaintzak. Eiguzu Jauna, gaur, zure maitasunean aurrera egitea - gure, eta gure senide guztien onerako izan dadin dena. Egizu, Jauna, gure biziera ikasbide argi izan dadila gizonen aurrean, - guztiek, gure egite onak ikustean, zeruko Aita gorets dezaten. Kristoren argiak gizon guztiei argi egin diezaien, eska diezaiogun Aitari etor dadila guztiongana bere erreinua: Gure Aita. Otoitza Jesukristo gure Jauna, Zu zara gizon guztiak salbamenerako bidean argitzen dituen egiazko argia; emaguzu zure indarra, zure aurrean zuzentasunaren eta bakearen bideak presta ditzagun. Aitarekin eta Espiritu Santuarekin.