GARIZUMAKO IV. EGUAZTENA

I. IRAKURGAIA	Is 49, 8-15

Herriaren itun izateko izendatu zaitut,
lurraldea berreraiki dagizun.

Isaias Profetaren liburutik

	Honan berba egiten dau Jaunak:
«Ondogura-sasoian erantzun deutsut,
salbamen-egunean lagundu.
Babestu zaitut
eta herriaren itun izateko izendatu,
herrialdea berreraiki dagizun,
lurralde hondatua ondaretzat banatu dagizun;
preso dagozanei esateko: "Urten kanpora",
eta ilunpean dagozanei: "Etorri argitara".
Bideetan bere larratuko dira,
muino gorri guztietan bazkatuko.
Ez dira gose, ez egarri izango;
sargori eta eguzkiak ez ditu joko,
erruki dituanak ditu-eta gidatuko
eta iturburuetara eroango.
Bide bihurtuko ditut mendiak
eta galtzadak zelaituko.
Hara non datozan urrunetik:
ipar eta mendebaletik datoz,
Egipto aldetik bere bai.
Egin poz-oihu, zeruok! Alaitu zaitez, lurra!
Egin poz-irrintzi, mendiok!
Jaunak bere herria kontsolatu dau-eta 
eta bere pobreentzat errukia izan dau.
Sionek esaten eban:
"Baztertua nauka Jaunak,
ahaztua nire Jabeak".
Ahaztu ete daike amak bere umetxoa
edota bere sabeleko umeari errukia ukatu?
Bada, amak umea ahaztuko baleu bere,
Nik ez zaitut zu ahaztuko!»

ERANTZUN SALMOA	Sal 144, 8-9. 13cd-14. 17-18


EBANJELIOA	Jn 5, 17-30

Ebanjelio aurreko txatala	Jn 11, 25a.26

V/. 	Neu naz biztuerea eta bizia -dino Jaunak-;
Nigan sinesten dauana ez da inoiz hilgo.

Aitak hilak biztu eta bizia emoten deutsen lez,
Semeak bere bizia emoten deutse gura dabenei.

D..Jesu Kristoren Ebanjelioa San Joanen liburutik

	Aldi haretan, Jesusek esan eutsen juduei: «Nire Aitak lanean dihardu beti, eta Nik bere lanean dihardut».
	Esandako honegaitik, juduak geroago eta gehiago ebilzan Jesus hil guran; zapatuko atsedena ez errespetatzeaz gainera, Jainkoa bere Aita ebala inoan-eta, bere burua Jainkoaren pareko eginez.
	Jesusek esan eutsen: «Egi-egiaz dinotsuet: Semeak ez daike ezer ere bere kabuz egin, Aita egiten ikusten dauana besterik: Aitak zer egin, haxe bera egiten dau Semeak bere. Izan bere, Aitak maite dau Semea eta Berak egiten dituan guztiak erakusten deutsoz, eta honeek baino egintza handiagoak bere erakutsiko deutsoz, harritu egingo zaitueenak. Aitak hilak biztu eta bizia emoten deutsen lez, Semeak bere bizia emoten deutse gura dabenei. 
	Aitak ez dau inor epaitzen epaitzeko ahalmen guztia Semearen esku itzi dau-eta, guztiek, Aita ohoratzen daben lez, Semea bere ohoratu dagien; Semea ohoratzen ez dauanak, Ha bialdu dauan Aita bere ez dau ohoratzen. Egi-egiaz dinotsuet: nire berbea entzun eta bialdu nauanagan sinesten dauanak, betiko bizia dau; ez da kondenatua izango, heriotzatik bizira igaroa da-eta dagoaneko. 
	Egi-egiaz dinotsuet: Badator ordua —hobeto esan, heldua da—, hildakoek Jainkoaren Semearen ahotsa entzungo dabena, eta entzuten dabenak bizi egingo dira. Aitak bizia bere barruan dauan lez, Semeari ere bizia bere barruan izatea emon deutso. Gainera, epaitzeko ahalmena emon deutso, Gizonaren Semea dalako. Ez harritu esaten deutsuedanaz; badator-eta ordua, hildako guztiek haren ahotsa entzungo dabena, eta hilobietatik urtengo dabena: ona egin ebenak betiko bizirako biztuko dira; txarra egin ebenak, ostera, kondenatuak izateko.
	Nik ez daiket neurez ezer egin: Aitari entzun lez epaitzen dot, eta nire epaia zuzena da, ez dot-eta helburu neure guraria egitea, bialdu ninduanarena baino».