GARIZUMAKO IV. ASTELEHENA.

I. IRAKURGAIA	Is 65, 17-21

Ez da han gehiago entzungo
negar-hotsik, ez garrasirik.

Isaias Profetearen liburutik

Honan berba egiten dau Jaunak:
«Hara, zeru barriak
eta lur barria egingo ditut;
lehengoen oroitzapenik ez da geldituko,
eta ez dira barriro gogora etorriko.
Bestetara, amaibako poza eta alaitasuna izango dabe 
Nik egingo dodanagaitik,
poz-uri egingo dot-eta Jerusalem,
alaitasun-herri bertako jentea.
Pozaren pozez izango naz Jerusalemengaitik,
alai neure herriagaitik.
Ez da han gehiago entzungo
negar-hotsik, ez garrasirik.
Ez da han izango jaio eta laster hilgo danik,
ezta bere adin betera helduko ez danik ere,
ehun urtetan hiltea gazterik hiltea izango da-eta,
eta ehun urtera heltzen ez dana madarikatutzat emongo.
Etxeak egin eta hareetan biziko dira,
mahastiak landatu eta hareen frutua jango dabe».

ERANTZUN SALMOA	Sal 29, 2 eta 4. 5-6. 11-12a eta 13b

R/. Goratuko zaitut, Jauna, onik atara nozulako.

Goratuko zaitut, Jauna, onik atara nozulako, 
arerioak nitzaz poztuten itzi ez dozuzalako.
Jauna, Leizetik  nire bizia atara dozu, 
zulora doazanakandik bizirik gorde nozu.  R/.

Eresi egiozue, zintzook, Jaunari, 
emon eskerrak Haren izen santuari.
Une bateko da Haren hasarrea, 
bizi guztirako Haren on izatea.
Negarra dator arratsaldean, 
baina poza goizean.  R/.

Entzun  niri, eta nitzaz erruki, Jauna, 
izan zakidaz laguntzaile, Jauna.
Negarra, dantza bihurtu deustazu, 
Jauna, ene Jainko, eskerrak nik Zuri beti.  R/. 

EBANJELIOA	Jn 4, 43-54
 
Ebanjelio aurreko txatala	Am 5, 14a.c

V/. 	Bilatu egizue ona eta ez txarra, bizi zaitezen,
eta Jauna zuekin izango da.

Zoaz, semea onik dozu eta!

D..Jesu Kristoren Ebanjelioa San Joanen liburutik

	Aldi haretan, Jesus Samariatik urten eta Galileara joan zan. Jesusek berak autortu izan eban, profetea ez dabela bere herrian aintzat hartzen. Halan ere, Galileara heldu zanean, galilearrek harrera ona egin eutsoen. Izan ere, Jerusalemen izanak ziran eurak ere eta ikusi ebezan Jesusek Pazko-jaietan egin zituan guztiak.
	Jesus Galileako Kanara joan zan barriro, ura ardo bihurtu eban herrira. Bazan han errege-funtzionario bat, semea Kafarnaumen gaixorik eukana. Funtzonarioak, Jesus Judeatik Galileara etorri zala jakitean, Haregana joan eta bere semea osatzera jaisteko eskatu eutson, hilzorian egoala-eta. Jesusek erantzun eutson: «Ezaugarriak eta egintza harrigarriak ikusten ez badozuez, ez dozue sinisten». Baina errege-funtzionarioak barriro: «Zatoz, Jauna, nire umea hil baino lehen». Jesusek esan eutson: «Zoaz etxera, semea onik dozu-eta». Gizonak sinistu egin eban Jesusek esana eta joan egin zan.
	Etxerakoan, morroiek urten eutsoen bidera, semea onik ebala esanez. Orduan itaundu eutsen zein ordutan hasi zan oneratzen. Eta hareek erantzun: «Atzo eguerdiko ordu batetan itzi eutson sukarrak». Konturatu zan aita ordu haretan esan eutsola Jesusek: «Onik dozu semea». Eta sinistu egin eben Jesusegan berak eta etxeko guztiek.
	Judeatik Galileara bihurtu zanean egin eban Jesusek bigarren ezaugarri hau.