Goizeko 11:00etan hasiko da Krisma-meza Santiago katedralean eta On Joseba Segura Eleizbarrutiko gotzain administratzailea buru dala ospatuko da. Aste Santuko gainerako eleizkizunak lez, jarraibide jakin batzuen arabera ospatuko da. Ospakizunaren amaieran, ilara bakarra antolatuko da klaustroaren inguruan Orio Santuak eta antolatuan jasoteko. Lagun arteko ezinbesteko tartea gordeko da eta Bikaritza Nagusiak kaleratu dauan oharrean esaten danez, gaur kanpotik datozanek jasotzea gomendatzen da eta Bilbok alkarteek Pazko-bigarrenetik aurrera jaso daiezala. Krisma-meza eta arratsaldeko 18:00etan ospatuko dan Jaunaren Afarikoa zuzenean jarraitu daitekez web orrialde honetatik.

Bizkaiko eleizetan guztira sartu daiteken jente kopuruaren %35a sartu daiteke orain. Katolikoentzat bereziak diran egun honeetan, osasunaren edo beste hainbat arrazoiren eraginez, etxetik uterterik ez dabenek zuzenean jarraitu daikiez eleizkizun edo mezak, komunikabideen eskaintza zabalaz baliatuz. Halanda be, Eleizbarrutitik dei egiten da ospakizunetara joateko, izan be, eleizak eremu seguruak dira. Aldizkarian mezu hori jasoten da azalean: Donejakue bideko erromes ibilbidea dan Ziortzako klaustroko arkupea non motxila bi eta makila bi itxi diran, “zeugaz batera” leku “osasungarrira” sartzeko.

Goizeko hamaiketan ospatu da Bilboko katedralean Krisma-Meza On Joseba Segura gotzain administratzailea buru zala. Beragaz batera Donostiako gotzain emerituak, on Juan Maria Uriartek, katedraleko kabildoko kideak, gotzain kontseiluko partaideak eta Elizbarrutiko abade batzuk be ospatu dabe. On Joseba Segurak bere homilian adierazo dau aberasgarria dala alkartearentzat eretxi eta aukera ezbardinak egotea. Ospakizunean orio santuak bedeinkatu dira eta krisma kontsakratu da. Ospakizun osoa hemen Argazkien galeria hemen

Bakardadearen Amaren prozesinorik egingo ez danez, Bilboko Santa Vera Cruz kofradiak Eukaristia ospatuko dau gaur arratsaldez, Luis Alberto Loyo katedraleko dean eta kofradia eta ermandadeen eleizbarrutiko ordezkaria buru dala, 19:30etan, Joan Santuak parrokian.

On Joseba Segura buru dala 11:00etan ospatuko dan Eukaristian, orio santuak bedeinkatu eta krisma kontsakratuko da. Zuzenean emongo dabe Radio Popular-Herri Irratitik be.

Paulo VI.a Aita Santuaren ekimenez, 1974an hasi ziran Lurralde Santuaren aldeko eguna ospatzen. Aita Santuak dei egin eutsen mundu osoko katolikoei Lurralde Santuko eleizei laguntza zehatza emoteko. Ekialdeko Eleizetarako Kongregazinoko prefektua dan Leonardo Sandri kardinalak egun honetarako idatzi dauan gutunean eskuzabaltasunez jokatzeko eskatzen dau, pandemiak jotako urte berezi honetan Lurralde Santuko makina bat kristau lan barik geratu da-eta, erromesik ez dalako bertara joan. Horren ondorioz, “egundoko zailtasunak dabez duintasunez bizitzeko. Eta hainbat herrialdetan, gerrek eta zigorrek indarrean jarraitzen dabenez, egoera are eta gatxagoa bizi izan dabe pandemiaren eraginez”. Gutuna osorik, hemen . On Joseba Segura Eleizbarrutiko gotzain administratzailea buru izango da Jaunaren Nekaldiko eleizkizunean, 18:00etan, Santiago katedralean. Zuzenean eskainiko da web orrialde honetan eta Radio Popular-Herri Irratian.

Orain dala egun batzuk aurkeztu genduan Donejakue bideko ibilbide bat, Roberto Gonzalez Zurdok Alkarren Barri – Comunicación aldizkariaren eskutik. Kasu honetan, Bizkaia zeharkatzen dauan Donejakue bideko ibilbiderik ezagunenetakoa, jente askok hartzen dauana. Kantabriko itsasertzetik doan Iparraldeko ibilbidea da, Galiziako Ribadeoraino doana eta, ondoren, barrurako bidea hartuz, Santiagoraino. Gaur, beste inguru bat bisitatuko dogu, eta Deba herribildu gipuzkoarra atzean itzita, Mutrikuko Olatz bailara zeharkatuz, erromesa Bizkaian sartzen da aldapa handian amaitzen dan mendi-bidetik Markina-Xemeinera helduz. Gonzalez Zurdok bide-zati honen inguruan zera nabarmentzen dau. “Teresa Donea karmeldar ordena erabarritzera eroan eban sen artega nabarmena da gaur Markinara heltzen diran erromesentzat”.

Bihar, Bariku Santua, Bilboko kofradiek hiru otoitzaldi ospatuko dabez. Lehenengoa, goizeko 9:00etan, Isiltasunaren prozesinoa izango da, Santiago katedralean, Mesedetako kofradiak antolatuta. Gero, eguerdiko 12:00etan, Kurutze-bide santua ospatuko da, hau be Santiago katedralean, eta Santa Vera Cruz kofradiaren eskutik. Ordu berean, Kurutze-bidea ospatuko da Indautxuko Karmeneko Ama parrokian be, kasu onetan ‘Escuelas Pías’ deitutakoen Jainkoaren Ama kofradiak antolatuta.

Indarrean dagozan osasun-murrizketak dirala-eta, Pazko bezperako ospakizuna aurreratu egingo da ospatu daiten leku guztietan. Esate baterako, Santiago katedralean, On Joseba Segura Eleizbarrutiko gotzain administratzailea buru dala ospatuko dan eleizkizuna 19:30etan hasiko da. Eleizkizun hau zein bihar eguerdiko –Pazko Eguna- Pontifize Meza –bedeinkapen apostolikoa parkamen osoagaz- web orrialde honetatik jarraitu ahal izango dira zuzenean. Biharko ospakizuna, gainera, Radio Popular-Herri Irratiak eta Telebilbaok be emongo dabe.

Hona hemen, besteak beste, eleizbarrutiaren web orrialdean astean zehar jaso diran barriak: Igone Etxebarriaren izendapena Labayru Fundazinoko zuzendari lez; "Jazotakoa jaso" bideoklipen lehiaketako saridunak; Ana Maria Castilloren "Tiempos convulsos" liburuaren argitalpena HOAC argitaletxearen eskutik; Bilboko kofradien ermandadearen erabagia Aste Santuko hainbat jarduera eleizetan ospatzeko eta Aste Santurako jarraibide barriak. Honeek eta beste hainbat ikusteko: www.bizkeliza.org