On Joseba Segura Eleizbarrutiko gotzain administratzailea buru dala ospatuko da gaur arratsaldeko seietan Bariku Santuko Jaunaren Nekaldiko eleizkizuna Santiago katedralean. Zuzenean emongo da web orrialde honetatik eta Radio Popular-Herri Irratitik.

On Joseba Segura Eleizbarrutiko gotzain administratzailea buru dala ospatuko da gaur arratsaldeko seietan Santiago katedralean Jaunaren Afariko meza. Zuzenean, baita be, Radio Popular-Herri Irratitik.

On Joseba Segura Eleizbarrutiko gotzain administratzailea buru izango da Gau Santu honetan 19:30etan ospatuko dan Pazko bezperako ospakizunean. Zuzenean eskainiko da web orrialde honetatik.

Atzo, apirilak 7, Bilboko kofradiek prozesino bako bigarren urte honen inguruko azterketa egin eta azalpenak eskaini ebezan. Prozesinorik ezean, bestelako eleizkizunak antolatu dabez: 3 Kurutze-bide, 4 Eukaristia, 3 otoitzaldi eta prozesino estatiko bat katedralean. Kofradien ermandadeko ordezkariak pozik agertu ziran, “kontrako inguruabarretan egokitzeko” gauza izan diralako. Baina datu positiboez gainera, bada zerbait negatiboa be: eleizetan guztira sartu daiteken jente kopuruaren “%35a baino sartu ezin daitekenez, kofradiakide eta fededun asko sartu ezinik geratu eta etxera joan beharrean izan zan”.

Marimar Gonzalez Zerbitzu Erlijiosorako Santa Marina ospitaleko koordinatzaileak be jaso eban Bizkaiko Eleizaren autorpena joan dan martxoaren 8an. Urte berezi honetan, lehenengo lerroan egon diran emakumeei omenaldia eskaintzea izan da asmoa eta, zalantza barik, Marimar izan da hor egon danetako bat. Iazko martxoaren 3an zerbitzua bera bertan behera geratu bazan be, osasun arloko beharginek laguntza eskatu eben eta berak duda barik erantzun eban. Egunero jarten eban bere buruaren babeserako jantzia eta gaixoei bideo-dei bidez senideakaz hartu-emonean jarten laguntzen eutsen, ez egoan-eta bisitarik. Gaixoen oliaduraren bat edo beste distantziara be egin eben “eta holan familiek senide maiteagaz batera sakramentua ospatzeko aukera izan eben”. Gaur, Osasunaren Munduko Egunean, gogoan doguz bakardadean, senideak agurtzeko aukera barik, hil diran guztiak, Santa Marina ospitalean, Osasun Pastoraltzari esker, agurtzeko aukera izan badabe be.

Athleticek jokatu dauan Errege kopako finalaren aurreko Aste Santuko egunetan agertu diran irudi batzuk ez dira bape hezigarri eta eredugarriak izan. Baina, kolore jakin batzuen jarraitzaile sutsu ugari dagoan lez, bada Jesusen jarraitzaile dan beste gazte asko be, honako hinegaz batera aurkezten diran argazkietan ikusi daitekenez. Bizkaiko hainbat herritan ospatu dabez pazkoak otoitz eta gogoeta giroan, esate baterako, Barakaldon, Alde Zaharrean, Oiz-Anboton, Santutxun, Sestao Pastoral barrutian, Meatzaldean, Deustun, Arraizpe Pastoral Barrutian eta San Fausto Pastoral Barrutian. Irudiak ikusteko, klik egin hemen .

Gaur, Osasunaren Munduko Egunez, joan dan martxoaren 8an, pandemian, “ohe-alboan” egon diran emakume guztiak omenduz, Bilboko Eleizbarrutiaren autormena jaso ebenetako beste emakume baten lekukotasuna berreskuratu dogu, hain zuzen be, Lourdes Amunategi Karidadeko Alaben ardurapean dagoan Gernikako Kaltzada egoitzako laguntzaileen koordinatzaile eta pastoral taldeko kidearena. Birusa hedatu zanean, “bildur eta zalantza asko” izan ebala autortzen dau, baina helburu nagusia egoitzako pertsona nagusien “bizia salbatzea” zanez, dana ahaztu eta taldeagaz batera buru-belarri lan egiteari ekin eutsala. Hasieran, egoitzan dagozanak hamabost egunez konfinatu ziran eta beranduago kontigentzia protokolo eta egitasmoak prestatu ebezan. Zorionekoa da bere lanean eta “aurrera egiteko” adore eta indarra emoten deutsan kristau sentsibilitatea daualako.

Joan dan martxoaren 8an Bilboko Eleizbarrutiaren autorpena jaso eben 8 emakumeetako bat dan Gracia Garijo medikuak pandemiaren urte gogor honetan Osakidetzako larrialdietarako zerbitzuko mediku lez biz izandako esperientziak kontatu deuskuz. Bere ikuspuntutik, gizarteak hasiera batean osasun arloko profesionalak heroitzat hartu baebazan be, makina bat lagun dago oharkabe pasatu bada be, bere burua besteen alde eskaini dauana. Gracia k autortzen dauanez, presino eta zama handiagoz jardun izan dau, baina bere egitekoan izan dauan aldaketarik erabakigarriena, “egiteko eta prebenitzeko era” izan da. Nabarmendu dauanez, pandemiaren lehenengo astindua bakardade handiz bizi izan da eta arreta emozionala falta izan da. Bere esanetan, “nire alderdi sinistedunaz asko baliatu izan naz urte honetan”, erraza zan-eta “giza jokaeraren etsipen eta deseingainuan” jaustea; fedeari esker, egoeraren “alde ona” be ikusi ahal izan dau.

2019ko apirilaren 6a izan zan gotzain laguntzailearen kargu hartzearen ospakizun ekitaldia . Harrezkero hainbat izan dira Bizkaiko Eleizeak bizi izan dauazan pasarteak. Nagusiena, jakina, osasun krisiarena eta berau izten dabilen ondorioak gure gizartean. Une honetan gotzain barriaren izendapena etorri bitartean, on Joseba Segura gotzain administratzailearen betekizunak egiten dabil eta berari laguntzen, on Mario Izeta Bilboko gotzain zan denporan egozan bikarioak dabilz. Martitzenero batzartzen dira Elizbarrutiaren ardura nagusiak aztertzeko. Bien bitartean, kristinau alkarteetan eguneroko pastoral jarduereak dirau, azkenaldian Aita Santuaren ´Fratelli tutti´ iparrorratz modura hartuta.

Apirilaren 18an Informazinoa