1940an jaio zan Getxon eta bertan izango da bere aldeko hileta elizkizuna, bihar, arratsaldeko zazpiretan Andra Mari eleizan. Bordelen egin zan abade eta bertan egon zan luzaro, ea hogei urtez. San Paulo eleizako parrokoa izan zan eta bertara joaten ziran Portugal eta Espainiako migratzaileen kapelau modura jardun eban. Behin Bilboko Elizbarrutira itzuli zanean, Sestaon egon zan eta bertan, JOC (Gazte Langile Kristauen) taldeetakoakaz euki eban zuzeneko loturea.

Zapatu honetan, abuztuak 29, hitzordu berezi bi daukiez Enkarterriko sinisdunek. Eguerdiko hamabietan, Gordexolan, Trinitario Alvarez abadearen agurreko mezea ospatuko da. Jubilau egiten da eta Bilboko abadeen egoitzara dator. Bestalde, Balmasedan, San Seberino parrokian Pedro Asua y Mendia beatoaren heriotzaren urteurreneko mezea ospatuko da arratsaldeko zortziretan.

Osasun neurriak agintzen dabenez, 10 lagun alkartu ahal izango dira gaur Arriagako enparantzan 19:30etan egingo dan Bizkaia Isilik bilkuran. Persona guztien duintasunaren alde egiten dan bilkura isil hau Bilbon baino ez da egingo hilabete honetan. Gainontzeko herrietan irailetik aurrera hasiko dira barriro. Begoña Merak, Elizbarrutiko Migrazino Pastoraletik adierazo dauanez, oraindino be ikusgarri egiten jarraitu behar da persona askoren egoera latza. " Jenteak hilten jarraitzen dau pateretan. Persona askoren egoera latza salatzen jarraitu behar dogu ". Herritarrei etxetik parte hartzeko eskabidea egiten jake: bost minutuko isilunea eginez eta kandela bat piztuz.

Gaur goizean mezea ospatu dau gotzainak Gernikako Errenteria auzoko San Bartolome eleizan. Pandemia barik gaur jaietako egun handia ospatuko zan bertan baina gaurko egoeran mezaren ospakizuna baino ez egoan egitarauan. Alkatea, Jose Mari Gorroño eta udaleko beste zinegotzi batzuk be izan dira mezatan. Bertan on Mario Izetak babesa eskatu deutsie San Bartolome eta San Rokeri, "une latz honeetan" eta "Jaungoikoa beti ondoan" dagoela gogorartu dau.

Atzo, San Bartolome egunez, Simon Rementeria mesedeetako erlijiosoa San Bartolome eleizan egon zan mezea ospatzen bere amagaz batera. Bizitza luzea dauka ordenaren barruan. 18 urte eukazala sartu jakon bokazinoa eta ordutik hainbat esperientzia bizi izan dauz. La Peña auzoan euki eban alkarteko lehenengo esperientzia. Han drogazaleakaz bizi izan zan. Madrilen, errefuxiatuen harrera pisu baten. Argentinan, Tukumanen, indarkeria ugari dagoan tokia eta beti be presoakaz batera. Ibilbide luzea azkenengoakaz.

Hamabost eguneko opor egun batzuren ostean barriro zabaldu dauz ateak`Jakinbidek´ Eleizbarrutiko liburudendeak. Bariku honetan itxita eukiko dauz ateak Bilbon jai eguna dalako baina gainontzeko egunetan han izango dozu lan taldea behar dozunerako. Ikasturtea hasiko da eta horrez ganera irailera atzeratu ziran hainbat Jaunartze be egongo dira. Oparietarako, parrokiarako zein uda sasoian irakurteko moduko edozein generotako liburuak aurkituko dozuz bertan.

Bilboko Elizbarrutiak alegazinoak aurkeztu deutsoz Eusko Jaurlaritzako Kultura Ondarearen Zuzendaritzari, Gaztelugatxeko San Juan Babes Bereziko Kultur Ondasun izendatzeko adierazpenaren inguruan. Tokia Monumentu Multzo izendatzea eta bereziki, ` Gaztelugatxeko San Juaneko Santutegiaren Multzo Erlijioso Aparta´ modura izendatzea eskatzen da idazkian. Inguruaren izaera erlijiosoa kontuan hartzeko eskatzen da berau dalako “ apartekotasuna eta ezaugarria ” emoten deutsona. Horregaitik, hauxe litzateke babestu beharreko balio nagusia.

Abuztuaren amaieran azken urteotan erromesaldia egiten dabe abadegaiek eta Seminarioan dagozan hezitzaileak gotzainagaz batera. Gaur urten dabe aste beteko txangoa egiteko Kantabria, Asturias, Leon, Valladolid eta Palentzian amaitzeko. Oviedo eta Valladolideko gotzainakaz. on Jesus Sanz eta on Ricardo Blaquezegaz ospatuko dabez mezak lurralde horreetara iristean.

Gaur Santa Monika eguna da eta bihar, San Agustin. Begoñan dagozan monja agustindarrek egun bi honeek modu berezian ospatzen dabez. Gaur goizeko bederatzietan euki dabe mezea erlijioso agustindar bat buru zala. Bihar, arratsaldeko zazpiretan on Mario Izeta gotzaina egongo da bertan mezea eurekaz ospatzen. Bien bitartean monjek otoitzean eta lanean jarraitzen dabe euren ortuan eta eleizetarako formak prestetan.

Gaur Eleizeak San Juan Doloz eguna ospatzen dau. Jai handia izaten da Bakio eta Bermeoko eleiztarrentzat. Izan be, egun hau ekainean ospatzen dan San Juan Bateatzailaren jaiagaz batera izaten da sinisdun gehien batzen dauazan eguna ermitan. Ekaineko erromesaldian mezak goizeko sei ta erdietatik aurrera orduro egoten dira eta gaurko honetan ohikoa da meza bi ospatzea. Aurton, baina pandemia dala-ta Bermeoko fraileek zein udaletxeak eta inguruan zaindu eta babesten arduratzen diran boluntario alkartekoak mezak bertan behera iztea erabagi dabe . " Badaezpada, eleizea txikia dalako ".