Eleizbarrutiko Teologia eta Pastoraltza Institutuak (ETPI ) “Un giro radical. Ministerialidad e institución en la Iglesia del siglo XXI”, Joaquin Perea abadearen liburua aurkeztuko dau bihar –eguena-. Sinodo-senari buruzko Sinodoa zerumugan (2022), Joaquin Perearen liburu barria, “eskaini beharreko zerbitzua da, ze bidegurutzetan gagozan hobeto ulertzeko. Vatikano II.a Kontzilioaren ildotik eraiki gura dogun eta eratzen dihardugun Eleiz eredu barritua indar barriez bultzatzean datza”, Carlos Garcia de Andoin ETPIko zuzendariak azaldu dauanez. Aurkezpeneko ekitaldia goizeko 10:30etan hasiko da Barria eraikineko lokaletan (Bilboko Plaza Barria, 4. 1. solairua). Institutuko arduradunek esan dabenez, joateko asmoa dabenek aldez aurretik jakinarazo deieela – idtp@idtp.org -, indarrean dagoan osasun egoeran gehienezko aforoa ez gainditzeko. Ekitaldia grabatu eta hurrengo astean ETPIren kanalean eskainiko da.

Datorren domekaz, urtarrilak 24, otoitz ekumenikoa ospatuko da Santiago katedralean arratsaldeko seietan, atzo –astelehena- hasi zan Kristauen Batasunaren aldeko Otoitz Asteari amaiera emonez. Hasiera batean, zazpietan hastekotan zan otoitzaldi hori, baina etxeratze-agindua aurreratu egin daitekela-eta, ordubete aurreratzea pentsatu dabe. On Joseba Segura gotzainak ospakizun ekumenikoan parte hartuko dau Eleiza anglikano, ortodoxo, luterano eta ebanjelikoko hainbat ordezkarigaz batera. Iaz Eleiza Adventista eta Filadelfiako Eleizako ordezkariak be ospakizunean izan ziran. Otoitzaldi hori zuzenean jarraitu ahal izango da web orrialde honen eta Bilboko Eleizbarrutiaren youtube kanalaren bidez.

Bilboko Eleiz Museoak eta Arte Ederren Museoak batera garatuko daben lankidetza-hitzarmena sinatzeko eta aurkezteko ekitaldian On Joseba Segura Eleizbarrutiko gotzain administratzaileak esan dauanez, museo bietako artelanen arteko “alkarrizketak” Bizkaiko ondarea beste era batera irakurteko baliagarri izango da, “gizarte, ekonomia eta kultura testuinguru anitzetatik etorritako lanekin hartu-emonean jarriko” daualako. Datozan bost urteetan garatuko dan hitzarmenak, gotzainaren esanetan, “gure kultura ondarea agertzera emoteko eta beste ikuspuntu batetik ikusteko” aukera emongo dau" . Gauza bera esan dabe Miguel Zugaza Bilboko Arte Ederren Museoko zuzendariak eta Juan Manuel Gonzalez Cembellin E leiz Museoko zuzendari teknikoak. Agerraldia, datorren udan erakusketa eskainiko jakon Luis Paret eta Alcazar margolariaren lan baten aurrean egin dabe.

Madrilen beste gotzain batzukaz batera gogo-jardunetan aritu ondoren etorri da barriro Bizkaira on Joseba Segura gotzain administratzailea. Aste honetan ohiko lanari ekingo deutso eta bere agendan, besteak beste, Aita Santuaren azken entziklika azaltzeko agerraldiak daukaz apuntauta. Gaur bertan, Indautxuko Karmengo parrokian dauka hitzordua arratsaldeko zazpi ta erdietan. Korpuseko parrokian beste horrenbeste egingo dau datorren eguaztenean, hilak 20an eta Portugaleten, datorren hilaren 10ean emongo dau berbaldia, arratsaldeko zazpiretan. Gernikan eskaini eban guztien arteko lehenengoa eta Errekalden, bere jaiotzako auzoan be azaldu eban Frantziskoren azken gutunaren testua.

Bilboko Eleizbarrutiak 1956an jarri eban martxan elizbarrutiko liburutegia. Derion Seminario Nagusia zabaldu zanean emon ebazan lehenengo urratsak liburutegiak be eta Andres Mañaricua jn. izan zan lehenengo liburuzaina. Ander Manterola abadeak 1970an hartu eban liburuzain kargua eta berrogeta hamar urte bete barri ditu egiteko horretan. Gaur egun, Eleizbarrutiko liburutegia Derioko ‘Seminarioa’ eraikinean dago eta askotariko gaietako (teologia, historia, psikologia, filosofia, zuzenbidea, fede hezkuntza) 140.000 liburuki gordeten dira bertan eta antzinako liburukiak -1480 eta 1870 bitartean argitaratutakoak- be jasota dagoz eta horretatik 13 inkunable dira, hau da, 1500 baino lehen argitaratutakoak.

Goizean aurkeztu dabe Bilbon “ Un giro radical. Ministerialidad e institución en la Iglesia del siglo XXI”, J oaquin Perea eleizbarrutiko abadearen liburua. Pereak laikotzaren erantzukizunaren garrantzia nabarmendu dau. Bere esanetan, “funtsezkoa da kristau ororen bateoaren garrantzia bultzatzea, kristauak, bateo horren eraginez, gizon eta emakume zoriontsu lez agertu behar daualako nahitaez, Jesusek emoten deutso-eta zoriontasun hori eta berak gainerakoei kutsatu behar deutse. Laikotza, ezinbestekoa da bidegurutze honetan”.

Eleizbarrutiko Ikastetxeak (EBI) sareko ikastetxeek hamar arrazoi emoten deutsez Bizkaiko familiei, euren seme eta alabentzat ikastetxea aukeratzeko orduan EBI sarekoen bereizgarriak ezagutu daiezan.

Abadegaiak eta euren hezitzaileak astelehenean joan ziran Ziortzako monastegira urteroko gogo-jardunetan parte hartzera. Gaur azken saioa euki dabe eta bertara, on Joseba Segura gotzain administratzailea joan da. Meza buru izan da euki daben ospakizunean eta bertan San Bizente, gaur gomutatzen dan zaindaria euki dau gogoan gotzainak. Izan be, bere lehenengo zerbitzu pastorala Barakaldoko San Bizenten egin eban eta gogora ekarri gura izan dau. Bestalde, abadegaiei Ebanjeliioa zabaltzeko eta barruko deabruak uxatzeko eskatu deutse. Horregaz batera, abegikor jokatzera, errukitsu izatera eta karisma guztietakoakaz bat egitera animatu dauz.

UrtarrilaK 24, 18retan Ospakizuna zuzenean hemen