Laugarren urtez jarraian, mundu osoko Eleizak Pobreen Munduko IV. Eguna ospatuko dau datorren azaroaren 15ean, aita santuak egindako deialdiari erantzunez. Azken urteetan, Bizkaiko Eleizak zeinu publikoak eginez erantzun deutso deialdiari. Lehenengoan, hainbat ikastetxek bat egiten ebelarik, hauxe zan, ikasleek tailerretan parte hartzen eben eta bigarrenean, parrokia alkarteei eta erakundeei zuzendutakoa, kulturarteko bazkari jentetsua antolatzen zan. Aurton, osasun egoera dala-eta, Bilboko Eleizbarrutiak Zeinua moldatu egin dau. Alde batetik, egunaren bezperetan, muralak egin eta eleizpetan edo herrian zehar ipiniko dira. Mural horreetan, “behartsuari eskua zabaltzea” dakarren konpromiso zehatzak jarriko dira, aurtengo mezuari jaramon eginez. Beste alde batetik, egun bateko soldata pandemia ldi honetan gehien sufritzen dabenei laguntzeko emotea eskatzen da.

Aurton Lourdesera egin daben erromesaldiaren irudiek ez daukie zerikusirik beste urte batzuetako irudiakaz. Urtero, Bizkaitar Hospitalitatearen eskutik, talde jentetsua joan izan da Lourdesera baina, oraingoak, bizi dogun osasun egoeraren eraginez, On Mario Izeta Burgoseko artzapezpiku hautatu eta gure Eleizbarrutiko administratzaile apostolikoa buru zala hainbat abadegaik eta Hospitalitateko kidek osatu daben talde txikia joan da.

Euskal Eleizbarrutietako Misinoen ordezkaritzak argitaratzen dauan ‘Los Ríos’ aldizkariaren azken aleak COVID-19 pandemiaren ondorioei aurre egiteko misinoko lurraldeetan –Ekuador, Venezuela, Kenya…- jaso dabezan larrialdietarako laguntzen barri emoten da. Gainera, joan dan domekaz ospatu zan DOMUND egunari ere eskaintzen jako hainbat orrialde. Aldizkariaren 267. ale honetan, gainera, hainbat eremutako pertsonek egin dabezan hausnarketatik –guztira, hiru, ondorioei, ikaskuntzei,… buruzkoak- lehenengoa jasoten da. Lehen zati honetan, ekonomia-gizarte ikuspuntua emoten dabe Patxi Zabalo unibertsitateko irakasle eta Hegoako kideak eta Juan Garibi Fiare Banka Etikoko estrategia eta garapen arloko zuzendariak. Aldizkaria osorik, hemen .

Urriaren 28an ospatuko da Eleizbarrutiko 16 ikastetxeen partaidetzagaz hirugarren urtez ospatu dan ‘Jazotakoa jaso’ bideoklipen lehiaketaren sari-banaketa. Urte berezi honetan, era berezian prestatu da ekitaldia be. Osasun krisia sortu aurretik aurreikusitakoaren arabera, ekitaldia Avellaneda ikastetxean ospatuko da, baina jente-kopuru mugatuagaz, eta bertan izango dira Bilboko gotzaina, eta lehiaketaren antolatzaile dan Kultur Erakundeen Mahaiko kideak. Eleizbarrutiko Ikastetxeen sareko beste sei ikastetxek online jasoko dabe saria euren egoitzetan eta Bilboko Eleizbarrutiaren youtube kanaletik jarraitu ahal izango dan topaketan parte hartzeko aukera izango dabe. Ekitaldiaren inguruan beste gauza bat nabarmendu daiteke: Somorrostro ikastegiko ikasleak arduratuko dirala azpiegitura teknikoaz, irakasgai hau daukielako orain ikus-entzunezko irakasgaian. Joan dan astelehenez egin zan datorren asteko ekitaldiaren entsegu orokorra.

“Eta zuk, zer dinozu? Esan, nahikoa da! Inor ez etxe barik”, goiburuaren haritik, datorren domekaz, urriak 25, bizileku bako pertsonen aldeko kanpaina ospatuko da. Bizkaiko Caritaseko eragile eta arduradunek etxebizitza giza eskubidea dala nabarmendu gura dabe kanpainaren ardatz lez eta euren esanetan, “ezinbestekoa da gizon eta emakume guztien duintasunerako”.

Bihar, urriak 23, barikua-, ‘Enkarterri Hoberantz’ sariaren XVI. Ekitaldia ospatuko da. San Viator EBI Eleizbarrutiko Ikastetxeen sareko ikastegiak eta Enkarterrietako Mankomunitateak antolatzen dabe sari hau, Bizkaiko Foru Aldundia, Enkartur, SPRI, ADR Enkarterrialde eta Enkarterri Group erakundeen laguntzagaz. Ekitaldia, ‘Amalurra’ dalakoaren instalazinoetan (Artzentales) ospatuko da, goizeko 11:30etatik aurrera, On Joseba Segura gotzain laguntzailea eta Ainara Basurko Ekonomia Sustapenerako Bizkaiko Foru Aldundiko Diputatua bertan dirala. Bizi dogun egoeraren eraginez, parte hartu ahal izango dauan jente-kopurua mugatua da eta murriztu egin da ekitaldiaren iraupena be. Esteka honetatik zuzenean jarraitzeko aukera dago.

Bilboko Eleizbarrutiko Kartzela Pastoraltzako Bidesari alkarteak ‘Esan ez’ egitasmoa jarri eban martxan orain dala urte batzuk, gazteen artean kontsua prebenitzeko. Kartzelan dagozan pertsonen zuzeneko lekukotasunen bidez gaztetxoak drogen kontsumotik eratorri daitekezan egoerez jabearaztea da egitarau honen helburu nagusia. Laugarren urtez jarraian, Somorrostro ikastegiak egitasmoan parte hartu dau eta Lanbide Heziketako bigarren mailako ikasleek preso biren lekukotasuna entzun eben ikastegian bertan.

Datorren eguenez, urriak 22, eleizbarrutiko ministerio ordenaturako erretiroa egingo da Bilboko Karmeneko Ama parrokian, 1o:00etatik 13:00era, Manuel Reus jesuita eta Deustuko Unibertsitateko irakasleak zuzenduta. Bizi dogun egoerarako guztiz egokia dan “Jesus sendagilea” goiburuaren haritik jardungo dau Reusek Ministerio Ordenaturako Idazkaritzak 2020-2021 kurtsorako antolatu dituan batzarretatik lehenengoan.

Bilboko Eleizbarrutiak orain dala 35 urte martxan jarri eban ‘Gizakia helburu Bizkaia’ erakundea, Estibaliz Barron Gizakia fundazinoko zuzendariak azaltzen dauanez, “mendetasunen eraginez euren bizitzak suntsitzen ebezan senide eta lagun maiteen atsekabearen aurrean besoa besoaren gainean geratzerik gura ez eben familia eta adiskideei erantzuteko”. Egunaren aurkezpenean adierazo dauanez, “urtero hobetzen saiatzen gara eskura doguzan bitarteko guztiak zulo baltzean dagozan pertsona horreei eta eurek zulo horretara bultzatzen dabezanei bertatik urteten laguntzeko”.

‘ Open House ’ 1992an Londresen sortu zan nazinoarteko arkitektura eta urigintza jaialdia mundu osoko 40 uri ingurutan garatzen da. Bilbon, laugarren ekitaldia ospatuko da aurton, hain zizen be datorren asteburuan –urriak 24 eta 25- eta formatu berezian, bizi dogun egoerara moldatuz. Holan, osasun eta prebentzino neurri guztiak bete ahal izateko, edozein jardueratan parte hartzeko edo edozein eraikin bisitatzeko ezinbestekoa da aldez aurretik izen-emotea web orrialde honetan. https://www.openhousebilbao.org . Eleiz Museoa da ekitaldi honetan bisitatu ahal izango dan eraikinetako bat. Honetan datza bisitaldia: ate nagusitik sartu, klaustroa, gangen aretoa eta eskailera eta lehenengo eta bigarren solairuko aretoak bisitatu.