Hasi da errenta autorpenaren kanpaina Bizkaian Jose Maria Ziarrusta Bilboko Eleizbarrutiko gerenteak dei egiten deutse autorpena lehenengo aldiz egiten dabenei Eleizaren eta gizarte erakundeen aldeko laukian jarri daien ‘X’, honan laguntza bi emoten dabezalako. Era berean, aurreko urteetan zerga-autorpena egin eta Eleizari laguntzeko laukia markatu dabenei be zuzentzen jake, lehenengo eta behin “euren knfiantza eskertuz eta dei eginez, zirriborroan egiaztatu daien ia lauki hori markatuta dagoan, holan %0,7 Eleizara zuzenduko dabelako eta beste %0,7 gizarte helburuetara”. Ogasunetik jakitera emon dabenez, informazinoa okerra dala edo zeozer falta dala ikusi ezkero, ezabatzeko, editatzeko edo datu barriak gehitzeko aukera dago.

Datorren eguaztenez, apirilak 14, Antonio Arandak berbaldia eskainiko dau Langile Pastoraltzarako Bilboko Eleizbarrutiko Sailak apirilaren 18an ospatuko dan Gizalegezko Lanaren aldeko Eleizbarrutiko Egunaren inguruan antolatuko dituan jardueren barruan. Berbaldia jarraitzeko izena emoteko epea bihar, apirilak 13, amaituko da eta izena emon gura dabenek mezua bialdu behar dabe pastoralobrera@bizkeliza.org helbidera. Arandak , “ Alkarren barri – Comunicación ” eleizbarrutiko aldizkariaren apirileko alean, garrantzitsutzat joten dau Bilboko Eleizbarrutiak sustatutako ekimena, honako jardunaldiek, bere ustez, “begiak zabaltzen deuskuez eta lana, gure gizartean, askotan, gizatasuna bera be kendu egiten dauala ikusarazten”.

Pazko aldiko bigarren domekaz –Jainkoaren Errukiarena-, Bizkaian bizi diran afrikarren alkartea San Anton eleizan batu zan hileroko Eukaristia ospatzeko. Abesbatza ginearra eta gazteen abesbatza eleanitzak lagundu eben atzoko ospakizunean.

Joan dan otsailean, Migrazinoetarako Gotzain Batzordeko Idazkaritzak Pertsonen Salerosketaren inguruko Sailaren bidez sustatuta, biktimen argazkien erakuskea ibiltaria aurkeztu zan Santiago katedraleko eta Deustuko unibertsitateko klaustroetan. Pertsonen salerosketaz gainera, gizartearen zati handi baten axolagabetasuna jaso daben eta, azkenean, eleiz eta herri erakundeen laguntzagaz zapalketa horretatik askatzea lortu daben pertsonek bizi izandako zoritxarra agertzera emoten zan erakusketan. Migrazinoetarako Bilboko Eleizbarrutiko Mahaiak Pertsonen Salerosketaren aurkako Gogoeta eta Otoitzerako Munduko Egunaren inguruan sustatu ebazan jardueretako bat izan zan erakusketa hau. Pandemiaren eraginez, lagun askok eta askok ezin izan eban argazkiak ikustera joan eta, horregaitik, Komunikabideetarako Sailak bisita birtuala egiteko aukera eskaintzen dau. Horretarako, klik egin irudian.

Larogeta hamaika urtegaz, “botak jantzita hil zan” atzo, “Jesus Solidarioa” alkartean ospatu eben Eukaristian adierazo ebenez. Hain zuzen be, San Salvadorreko Artxidiozesian dagoan alkarte horretan emon ditu azken hogeta bost urteak, hango jenteagaz bizia eta fedea konpartituz. Orion jaio zan eta umetatik gura izan eban erlijioso izatea. 1950ean egin eban botoa anai marista lez. Vatikano II.a Kontzilioagaz, bizitzan biraketa esaguratsua egin eta abade ordenatu zan 71 urte ebazala, “gizarte lana egiteko eta txiroakaz egoteko”. Bere misiolari senak bultzatuta, gizarte ekintza sustatu eban eta ‘Círculo Solidario’ GKEa sortu eta honen bidez lan handiak egin izan dira landa-eremu behartsuetan: errepideak, ur-instalazinoak, e.a. El Salvadorrera heldu zanetik, bitarteko urriak dabezan gazteen heziketan jardun izan dau. Euren alkartean hartzen dabez eta bekak emoten deutsez unibertsitatean ikasi daien. Idazle oparoa izan da, 20 liburutik gora idatzi ditu eta Ebanjelioaren azalpenak bialtzen eutsezan gura eben guztiei. Goian bego! Hain zuzen be, Domun egunaren astean hil da Patxi Loidi sen misiolaria umetatik bizi izan dauan gizona. Patxi Loidik “Alkarren Barri – Comunicación” eleizbarrutiko aldizkariari 2019an eskaini eutsan alkarrizketan adierazo ebanez, berak misiolari lez eban asmoa “kristau bokazino helduak garatzea” zan. “Lider izateko gaitasuna” daben kristauak hezi behar zirala inoan, eta ez “lider kristauak” . Fedean hezi nahi ebazan “emakume eta gizaon gazteak; Ebanjelioa benetan aintzat hartu daiela eta herri zein Eleizan benetan bizi daiela”. Langile nekaezina, “umoretsu eta gogotsu” jarraitzen eban 90 urtegaz be, “otoitz egiten denpora asko” emonez, lanak izten eutsanean. Asko maite izan dabe gizon hau eta horren erakusle dira Facebookeko bere perfilean eskaintzen deutsezan mezuak edo Artxidiozesian bertan agertu dabezan sentimentuak. “Gaur, Patxi maitea, Sortzailearen besoetara itzuli zara, eta buruz buru zagoz hainbestetan agertzera emon deuskuzun Haregaz; zuri esker, Aita Jainkoa era guztietako behartsuenengan ikusten ikasi genduan. Eskerrik asko gure aberriari erakutsi deutsazun alkartasunagaitik, atzerritar izanda, zeure egin zenduan-eta El Salvador… Gaur, zurekin bizi izandako une ederrak eta gutako bakotxagaz izan zenduzan solasaldi mamintsuak. Villa Madrik, El botoncillal, Las Marías alkarteen eta nire izenean, eskerrik asko bestelako mundua egiten ahalegintzeagaitik eta guztion bizitzan arrastoa izteagaitik”, idatzi dau Amelia Orantes de Duranek. Bere oroimenezko Eukaristia El Salvadorren Gaur –urriak 16, barikua- Jesus Solidario alkarteak Patxi Loidiren oroimenezko meza ospatuko dau arratsaldeko seietan, El Salvadorreko Santos Niños Inocentes parrokian.

‘Bizian gora – Vida ascendente’ nagusien mobimentuak kurtsoari hasiera emon deutso gaur, eguerdiko 12:00etan Bilboko San Nikolas eleizan ospatu daben Eukaristiagaz. Mezaren aurretik, Juan Angel Axpe kontsiliarioak eta Tomy Rodriguez mobimentuko eleizbarrutiko presidenteak hitz batzuk zuzendu deutsiez bertaratutakoei.

Joan dan barikuz, urriak 2, aurtengo lehenengo kontzertua ospatu zan Balmasedan eta bihar –urriak 17, zapatua-, Mañarian kontzertua izango da. Paueko Lurralde Kontserbatorioko organo-irakasle eta Donibane Lohizuneko eleizako organista titularra dan Jesus Martin Moro organistak musika barrokoa eskainiko dau bere emonaldian, “eskola, maisu eta ikaslea” goiburuaren haritik. Flandestar, italiar gaztelar eta aragoiar eskoletako lan barrokoak interpretatuko ditu, hain zuzen be artista honeenak, esate baterako: Bruna, Sweelinck, Scheidemann, Frescobaldi, Correa de Arauxo, Aguilera de Heredia.

Feli Martin Misinoetarako Bilboko Eleizbarrutiko Ordezkariak gogoeta egin dau datorren domekaz, urriak 18, ospatuko dan Domund eguna dala-eta, besteak beste, 231 misiolarik jarduten daben leku hareetan ze egoera bizi daben azalduz. Bere esanetan , pandemiak markatutako urte honetan, mundu osoan hedatuta dagoan egoera latz honen ondorioak are eta “mingarriagoak” dira lekurik txirotueentan, desbardintasuna dalarik hango ondoriorik txarrena. Kanpaina honetan, “aurpegia jarri gura jake pandemiari aurre egin beharrean dagozan eta horretarako baliabide urriak –diru gitxi, osasun arreta eskasa…- dabezan gizon eta emakumeei, familiari jatekorik eroan ezinda, gaixotzeko edo hiltzeko bildurrez,… bizi diran pertsonei”. Asteburuko ospakizunetan diru-laguntza eskatuko da parrokietan, misinoko lurraldeetan garatzen diharduen egitasmoetara zuzentzeko.

Algortako Bariko San Nikolas parrokiako boluntarioek Elikagaien Bankutik bialtzen deutsien janaria banatzen dabe. Eurek azaltzen dabenez, “ hilean behin janari ez galkorrak jasoten genduzan sorta eta poltsetan prestatuta eta horreen banaketa arduratsua egiten ahalegintzen ginen”. Eredu honen inguruan hausnarketa egin eta egokiena zan ala ez aztertu ondoren, gizarte bazterketa jasaten eben pertsonakaz jarduten eben erakundeetara jo eben, hain zuzen be Sortarazira eta Yala egitasmoa garatzen dauan Harribide Fundazinora. Honeen eskutik, beharrizanen dagozan pertsonei janariak batzeaz gainera, laguntza eta akonpainamendua emoten jake euren egoerak hobera egin daian, hau da, euren esanetan, “dalako pertsona horreentzat egoera eskas hau kroniko bihurtzea saihestu gura da edo pertsona horreek menpeko egitea eta, gainera, ereduaren inguruan hausnartzen lagundu euskuen”.

Laugarren urtez jarraian, mundu osoko Eleizak Pobreen Munduko IV. Eguna ospatuko dau datorren azaroaren 15ean, aita santuak egindako deialdiari erantzunez. Azken urteetan, Bizkaiko Eleizak zeinu publikoak eginez erantzun deutso deialdiari. Lehenengoan, hainbat ikastetxek bat egiten ebelarik, hauxe zan, ikasleek tailerretan parte hartzen eben eta bigarrenean, parrokia alkarteei eta erakundeei zuzendutakoa, kulturarteko bazkari jentetsua antolatzen zan. Aurton, osasun egoera dala-eta, Bilboko Eleizbarrutiak Zeinua moldatu egin dau. Alde batetik, egunaren bezperetan, muralak egin eta eleizpetan edo herrian zehar ipiniko dira. Mural horreetan, “behartsuari eskua zabaltzea” dakarren konpromiso zehatzak jarriko dira, aurtengo mezuari jaramon eginez. Beste alde batetik, egun bateko soldata pandemia ldi honetan gehien sufritzen dabenei laguntzeko emotea eskatzen da.