Pazko aldiko bigarren domekaz –Jainkoaren Errukiarena-, Bizkaian bizi diran afrikarren alkartea San Anton eleizan batu zan hileroko Eukaristia ospatzeko. Abesbatza ginearra eta gazteen abesbatza eleanitzak lagundu eben atzoko ospakizunean.

Joan dan otsailean, Migrazinoetarako Gotzain Batzordeko Idazkaritzak Pertsonen Salerosketaren inguruko Sailaren bidez sustatuta, biktimen argazkien erakuskea ibiltaria aurkeztu zan Santiago katedraleko eta Deustuko unibertsitateko klaustroetan. Pertsonen salerosketaz gainera, gizartearen zati handi baten axolagabetasuna jaso daben eta, azkenean, eleiz eta herri erakundeen laguntzagaz zapalketa horretatik askatzea lortu daben pertsonek bizi izandako zoritxarra agertzera emoten zan erakusketan. Migrazinoetarako Bilboko Eleizbarrutiko Mahaiak Pertsonen Salerosketaren aurkako Gogoeta eta Otoitzerako Munduko Egunaren inguruan sustatu ebazan jardueretako bat izan zan erakusketa hau. Pandemiaren eraginez, lagun askok eta askok ezin izan eban argazkiak ikustera joan eta, horregaitik, Komunikabideetarako Sailak bisita birtuala egiteko aukera eskaintzen dau. Horretarako, klik egin irudian.

Datorren apirilaren 18 an gizalegezko lanaren aldeko eleizbarrutiko I. eguna ospatuko dogu. Lanak garapen eta hazkunde pertsonalaren eragile lez dauan gizatasunsenean arreta jarriz bizitzeko aukeratzat hartu gura dogu. Lanak pertsona egiten gaitu, doeak banatzeko, hartu-emonak eratzeko eta giza familia zaintzeko eta giza familia lez bizitzeko aukera emoten deusku.

Somorrostro ikastegiak eta Edinorrek TEK Somorrostro aurkeztu dabe, Euskadin heziketa-eremuan lehenengo aldiz sortu dan lekuko komunidade energetikoa. Autokontsumo erara, 150 familiek parte hartu ahal izango dabe energia barriztagarria eskuratuz.

Datorren domekaz, apirilak 18, Gizalegezko Lanaren aldeko Eleizbarrutiko I. Eguna ospatuko dogu. Hori dala-eta, On Joseba Segura Eleizbarrutiko gotzain administratzaileak oharra kaleratu dau , besteak beste, “Gizalegezko Lanaren aldeko Egun” hau ospatuz, lanak gizon eta emakume guztien garapenerako dauan garrantzia are gehiago nabarmendu gura dala azalduz: “Giza lana, lanbidea baino gehiago da eta egindako lanaren truke jasoten dan soldata baino balio handiagoa dau. Lanak gure hartu-emonak eratzen ditu eta gizartearen garapenerako bultzada da; nortasuna emoten deusku eta gizarte autorpena”. Idazkia osorik: hemen .

Eleiz Museoan (Gizakundea plaza z/g) barrokoari –XVII. eta XVIII. gizaldiak- eskaintzen jakon aretoa barriztatu egin behar dabe eta, horregaitik, jentean ezin izango dau bisitatu. Aste honetatik aurrera, areto hori itxita dagoan bitartean, Museora doan sartu ahal izango da. Aukera ederra, beraz, erromanikotik hasi eta gaur egun arte, arte bizkaitarraren 800 urteko historian murgildu ahal izateko.

Gaur, apirilak 16, Jose Maria Zavalak zuzendutako ‘Amanece en calcuta’ pelikula estreinatuko da Getxo zinemetan eta Bilboko multizineetan. Kalkutako Ama Teresaren inguruko lekukotasunak jasoten ditu pelikula honek. Hain zuzen be, agertzen diran sei lagunen berbek “ikututa izten gaitue”, On Joseba Segura Eleizbarrutiko gotzain administratzaileak pelikula Bizkaian estreinatuko dala-eta grabatu dauan bideo-mezuan adierazo dauan lez.

Hainbat azterlanen arabera, Orozkoko San Joan Bateatzailea eleiza 1180koa da, egiten diharduen ikerketa historikoen egoera dala-eta, gaur-gaurkoz zehatz-mehatz esatea gatxa bada be. Hori bai, gaur egungo egitura XVI. gizaldikoa dala egiaztatu daiteke. Berrogeta hamarreko hamarkadaren erdi inguruan, parrokiak eleiza barria jasotzea erabagi eban, hain zuzen be biztanleria gehiena jasoten dauan Zubiaur inguruan eta oran zaharbarritu daben eleiza historikoa desakralizatu eta itxi egin eben.

Beste aste batez, askotariko barriak jaso doguz web orrialde honetan, besteak beste: Bilboko Eleizbarrutiak, Bokazinoen eta Sorterriko Bokazinoen aldeko Mundugo Otoitz egunari lotuta ospatuko dan "12 orduko otoitzaldian" parte hartzeko egin deuan deia; Gizalegezko Lanaren aldeko Eleizbarrutiko Eguneko jarduerak eta Eleizbarrutitik egindako eskaria, zerga-autorpenean Eleizari laguntzeko eta gizarte ekintzetarako laukia markatzeko. Guzti honeek eta beste hainbat: www.bizkeliza.org

(Bokazinoen aldeko Munduko Otoitz Eguna) (20:15, Eukaristia ospatuko da On Joseba Segura Eleizbarrutiko gotzain administratzailea buru dala Begoñako Basilikan) (Zabalbide)