Apirilaren 18an Informazinoa

Adiskide eta Senide

Basilio Astulezek zuzenduta eta Gerardo Rifon organistak lagunduta, Leioako San Joan Bateatzailea koralak eskainiko dau aurtengo zikloko lehenengo kontzertua, 19:30etan. Lehenengo zatia, Andra Mari basilikako korutik eskainiko dabe eta bigarrena, ‘a capella’ tenpluko nabean. Pantaila bi jarriko dabez, bertaratutakoek emonaldia hobeto jarraitu daien. Arandoño Kultur Alkarteko arduradunek jakinarazo dabenez, ezinbestekoa da gonbidapenak ‘Axpe’ tabernan jasotea, leku guztiak -200- bete arte. Basilikara doazan guztiek eskura izango dabe gel hidroalkoholikoa eta, kontzertua hasi baino ordu erdi aurretik, eleizpe nagusiko atea zabalduko da bakarrik.

Ekonomo, etxezain eta ostatuko arduradun lanetan ibili izan dan Abdon Rodriguez Hervas monjeak Ziortzako zistertar monasterioa itzi egingo dau, bere jatorrizko alkartea dan Kordobako ‘Santa María de las Escalonías’ deitutako monasterioko priore izendatu dabe-eta. Hiru urtez egon da Ziortzan eta orain J avier Urosen lekua hartuko dau Kordobako alkartean, hau Olivako (Nafarroa) monasterioko Abat izendatu eben-eta, Isaak Totorikaren heriotza gertatu zanean. Antonio Maria Martin kolegiatako priorearen esanetan egiteko eta ardurak barriro banatu behar izan dabez, monasterioko eta ostatuko beharrizanei egoki erantzun ahal izateko.

“Gizartearen muina, lan duina” goiburuaren haritik ospatuko dau Bizkaiko Eleizak Gizalegezko Lanaren aldeko Eleizbarrutiko I. Eguna, apirilaren 18an. Manu Moreno Karidade eta Zuzentasunerako Ordezkariak alkarteetara bialdu dauan gutunean adierazoten danez, eta “ekoizpen eta kontsumorako jardunbideak merkantzia bihurtu dau lana” kontuan hartuta, “Eleizbarruti lez, egoki deritzagu gizalegezko lanaren aldeko konpromisoaren inguruan hausnartzeko” d omeka bat izendatzeari. Aldi berean, bere esanetan, konpromiso hori sendotzea ezinbestekoa da, “lanak gizon-emakumearen nortasunik sakonena agertzera emoten deusku-eta”. Aurretik, apirilaren 14an, Antonio Aranda Lan Pastoraltzarako Gotzainen Batzarreko Saileko arduradunak berbaldia eskainiko dau 19:00etan.

Herri ijitoaren Nazinoarteko Eguna ospatzen da gaur eta Juanan Arrieta Otxarkoaga ikastegiko zuzendariak adierazo dauanez, ikasleen ehuneko jakin bat etnia batekoa ala bestekoa izatea baino garrantzitsuagoa “pertsona horreek harrera sentitzea eta eskatzen dabezan heziketa-ibilbideetan txertatuta egota da”. Ijito diran ikasleen kasuan, batzuk mekanikan dagoz, beste batzuk elektrizitatean, soldaduran edo pelukerian, danak be euren gaitasunak garatzen eta “beste ikasle batzukaz batera heziketa jasoten”.

Joan dan martxoaren 21ean, Mons. Jean Pierre Tafunga Lubumbashiko (Kongoko Errepublika Demokratikoa) Artxidiozesiko Artzapezpikua hil zan Pretorian (Hego Afrika). Euskal Eleizbarrutietako Misinoen web orrialdean jasoten danez, gaur –apirilak 9, barikua-, bere arimaren aldeko hileta-eleizkizuna ospatuko da Lubumbashiko katedralean. 2020ra arte Euskal Eleizbarrutietako Misinoetarako gotzain ordezkari izan zan On Mario Izetak 2014an ezagutu eban artzapezpikua, eleizbarrutiko ordezkaritzagaz Kongora joan eta Likasi, Bunkeya eta Kanseniako misinoak eta bertan “Mufungaren adiskideak” eta “Goikouria fundazinoa” erakundeen eskutik garatzen diran egitasmoak zuzenean ezagutuz. Urte berean, hil barri dan artzapezpikua Bilbora etorri zan bisitan, honako honegaz batera ikusi daiteken bideoan Feli Martin ordezkariak azaldu ebanez. Goian bego Mons. Tafunga.

Mundu osoko miloeka musulmanek –baita Bizkaian bizi diranek be gaur hasiko dabe Ramadana. Miguel Angel Esnaola ekumenismo eta erlejinoen arteko hartu-emonerako Bilboko Eleizbarrutiko ordezkariak gure inguruko katoliko eta musulmanen arteko harreman instituzionalaren inguruko adierazpenak egin ditu. Bere esanetan, alkarrizketa hori urratsez urrats gauzatzen ari da, “artisau-lana izango balitz lez” . 2016ko martxotik aurrera, hainbat aldiz batzartu dira eta hainbat jarduera antolatu dabe alkarregaz. Horretarako, ezinbestekoa izan da hainbat erakunde eta talderen – Ellacuria fundazinoa, Onda Euskadi alkartea, FIVASCO, Jesusen lagundia, Bilboko Udala eta beste batzuk - esku-hartzea. Esnaolaren ustez, Aita Santuak Irakera egin dauan azken bidaia bultzada eta urrats historikoa izan da “mundu arabiarrean kristautasunera zabaltzeko”.

Datorren apirilaren 18 an gizalegezko lanaren aldeko eleizbarrutiko I. eguna ospatuko dogu. Lanak garapen eta hazkunde pertsonalaren eragile lez dauan gizatasunsenean arreta jarriz bizitzeko aukeratzat hartu gura dogu. Lanak pertsona egiten gaitu, doeak banatzeko, hartu-emonak eratzeko eta giza familia zaintzeko eta giza familia lez bizitzeko aukera emoten deusku.

Apirilaren 25ean, Bokazinoen aldeko Munduko 58. Eguna eta Sorterriko Bokazinoe n Eguna ospatuko da “Norentzat naz?” goiburuaren haritik. Aurton, Frantzisko Aita Santuak dei egin deutse gazteei, “baina, nor naz?” galdera egin deioen euren buruari. Aita Santuaren mezua osorik: hemen . Bezperan, apirilak 24, “Bokazinoen aldeko 12 orduko otoitzaldia” ospatuko da Seminarioan, goizeko bederatzietatik gaueko bederatzietara. Taldeak osatuko dira, txandaka kaperan otoitz egin daien. COVID-19ak eragindako egoerari aurre egiteko neurriak dirala-eta, ezinbestekoa da aldez aurretik izena emotea ( hemen ), txanda bakotxean sartu daiteken jente-kopurua ez gainditzeko. Otoitzaldiari amaiera emoteko, Eukaristia ospatuko da Begoñako basilikan, 20:15etan, On Joseba Segura Eleizbarrutiko gotzain administratzailea buru dala. Apirilaren 25ean, domekaz, 19:00etan Bilboko katedralean, laiko-ministerioen ezarpena ospatuko da.