Bilboko Kofradien Ermandadeak gaur ospatutako prentsaurrekoan jakitera emon dauanez, aurton Aste Santuan ohikoak diran kaleko prozesinoen ordez, eleizetan ospatuko dira Kurutze-bideak, indarrean dagozan osasun-neurri guztiak betez. Erramu-domekaz, Begoñako kofradiak ez dau Karidadearen prozesinoa ospatuko eta, horren ordez, Kurutze-bidea egingo dau Begoñako basilikan 18:15etatik aurrera. Kurutze-bidea zein ostean ospatuko dan Eukaristia, zuzenean emongo dira web orrialde honetatik.

On Joseba Segura Eleizbarrutiko gotzain administrazinoa buru dala ospatuko da Erramu-domekako ospakizuna Santiago katedralean, eguerdiko 12:00etan. Zuzenean jarraitu ahal izango da, web orrialde honetatik zein Telebilbao katetik. Erramu-domekako ospakizunak emoten deutso hasiera osasun-egoerak baldintzatuta biziko dan Aste Santuari. Hain zuzen be, martxoaren 12an, Eleizbarrutiko Bikaritza Nagusitik 2021ko Aste Santuko ospakizunetarako jarraibideak ( hemen ) argitaratu ziran.

Datorren zapatuz, martxoak 27, Bizkaiko Eleizan Eleizbarruti osoko gazteen topaketa egingo da, batzuk leku jakin batean batuko diralarik eta beste batzuek online jarraituko dabelarik. Sareen bidez jarraitzeko, #gaztopa (Gazteen topaketa) etiketa erabili behar da. On Joseba Segura Eleizbarrutiko gotzain administratzailea izango da buru, alde batetik aita santuaren ‘ Fratelli tutti ’ entziklikaren hainbat azpimarra eskainiz eta, bestetik, bikaritzetako gazteek online egiten deutsezan itaunei erantzunez. Hitzordua, goizeko 10:30etan da Gotzaitegiaren Plaza Barriko egoitzan. Topaketaren antolaketaz arduratuko dan Fede-zabalkunde eta Katekesiko kide dan Roberto Vidal diakonoak emongo deutso hasiera ordu bata inguruan amaituko dan jardunaldiari. Gazteen taldeek hemen emon daikie izena.

Fede-zabalkunde eta Katekesirako Ordezkaritzak bertan behera itzi dau zapatuko –martxoak 27- gazteen topaketa, jardueraren garapen egokia eragozten daben arrazoiengaitik. ‘Fratelli tutti’ entziklikaren inguruan jardutea zan helburua, batzuk alkartuta eta gehienek online bat eginez eta Eleizbarrutiko gotzain administratzailearen partaidetzagaz. Honen haritik, Ordezkaritzak dei egiten dau “ Adiskide eta senide. Comunidades acogedoras ” lagungarrietara jo eta On Joseba Segura gotzainaren berbaldia berreskuratzeko eta lantzeko.

Misinoen Eguna, Arrazakeriak eragindako Bereizkeria deuseztatzearen aldeko Nazinoarteko Eguna, Downen Sindromea dabenen Munduko Eguna, Loiuko Mesedetako monjek klausurako bizitza onartu ebeneko 400. urteurrena, Mendiko San Jose parrokiaren 50. urteurrena ospatu dira, besteak beste asteburuan Bizkaiko Eleizan. Migrazinoetarako Eleizbarrutiko Mahaiak bat egin eban #ArrazakeriarenAurkaEgin eguneko jardueragaz eta Somorrostro ikastegiak #DownenSindromearenMunduko Eguna dalakoagaz.

2021ko otsailean ospatu dan VII. Bake Topaketaren ondoren, bertan erabilitako lagungarriak eskuragarri jarri doguz, beste une batzuetan pastoralgintzan erabili ahal izateko.

Nekaldiaren kofradiak ezin izango dau ospatu Bilboko Aste Santuko bere lehenengo prozesinoa, Doloretako Ama Birjinarena eta, horren ordez, “Mariaren zazpi minak” otoitzaldia ospatuko dau, Maria Birjinaren bizitzako gertaerak gogoratuz. Nekaldiaren kofradiatik azaldu dabenez, dalako gertaera horreek “deitura herrikoi dira eta sarritan arteak jasoten ditu. Gainera, ohikoa da hausnarketarako horreez baliatzea, Aste Santuari hasiera emoteko egingo dogun lez”.

Bizilekurik ez izateak dakarren bazterketaren eta bizilekurik ez daukien pertsonen aldeko ‘BesteBi’ plataforma kalera atara da “Peter” deitutako lagunaren heriotza salatzeko eta gertaera horrengaitik atsekabea erakusteko. Plataformako kideen esanetan, urte bi inguru eroiazan Bilbon, kalean bizi zan eta gizarte konfinamendua beteteko La Casilla polikiroldegian hartu eben. Konfinamendua amaitu eta dalako aterpe hori itxita, udal aterpetxe batera joatea erabaki eban eta hara erretiratzen izan da gehienetan. Piterrek 23 urte ebazan, jatorriz poloniarra zan eta ohikoa zan Uribarri auzoan ikustea.

Meza latinoamerikarrean parte hartzen daben taldeen (‘Txoko Latino’, ‘Priostes de la Virgen del Cisne’, ‘Kawsana’ taldea, ‘Kushi-Vivir la alegría’ eta ‘Unidos por la Fe’ taldea ) eskutik ospatuko da Kurutze-bidea gaur arratsaldez San Luis Beltran parrokian, 16:30etan, indarrean dagozan osasun-neurri guztiak betez. Antolatzaileek azaldu dabenez, parrokia horretara joango dira, “txandakatzeearen bidez eta kulturarteko taldeak dagozan parrokia alkarte guztiak bisitatzeko asmoz”.

Igone Etxebarria Labayru Fundazinoko zuzendariak, Galo Bilbao Bake eta Adiskidetzerako Eleizbarrutiko saileko arduradunak eta Fernan Gorrotxategi kazetari eta Komunikabideetarako Saileko kideak osatu daben epaimahaiak gaur emon dau ezagutzera EBI sareko eleizbarrutiko ikastetxeetan ospatzen dan ‘Jazotakoa jaso’ bideoklipen lehiaketaren IV. ekitaldiko epaia, alde batetik aldiz aldi sariak esleituz, euskera onena erabili dauan bideoklipa eta jakintzagaiak ondoen buztartu dituana aukeratuz. Markinako Berakruz ikastolak aurkeztu dauan “Erantzi mozorroak” bideokliparentzat izan da bideoklip onenaren saria –honako honegaz batera agertzen da-. Jentearen bideoklipik gustukoena, Elorrioko Maria Bitarteko ikastetxeari emon deutse. Lehiaketaren antolaketaz arduratu dan Kultur Erakundeen Mahaitik esker ona adierazo deutse ikastetxeetako irakasle eta ikasleei parte hartzeagaitik eta aurkeztu dabezan bideoen kalitateagaitik. Bideoklip guztiak, hemen .