On Joseba Segura Eleizbarrutiko gotzain administratzailea buru dala ospatuko da gaur arratsaldeko bostetan Gabon-eguneko Eukaristian Basauriko kartzelan. Jorge Muriel Kartzela Pastoraltzarako Eleizbarrutiko arduradunak orain dala egun batzuk Herri Irratian egin eutsen alkarrizketan adierazo ebanez, Eukaristia honetan ohikoak baino jente gehiagok parte hartzen dau. Bere esanetan, “ egun zailak dira, eta are gehiago urte honetan. Kartzelara itxaropen apur bat eroatea da gure nahia”. Murielek asko baloratzen dau “On Joseba Segura gotzainak eta, Bilboko gotzain izan dan bitartean, On Mario Izeta gotzainak, kartzelan dagozanei erakusten deutsen gertutasuna, beti, prest hareengandik gertu egoteko”. Alkarrizketa osoa esteka honetan. Gaurko ospakizunean oraintsu hildako Angel Mari Unzueta, pastoraltza honetako partaide be izan zana eukiko da gogoan bereziki.

Gerardo Rifon organistak eta Lucia Gomez mezzosopranoak jardungo dabe gaur arratsaldez Durangoko san Frantzisko monasterioan iluntzeko zazpiak eta erdietan “Organo kontzertuak 2020” jaialdiko azken emonaldian. Beste alde batetik “ Bizkaiko hotsak 2020 ” jaialdia bihar –domekea- amaituko da, C eline Victores-Benavente, Leonardo Valazza eta Miriam Cepedaren emonaldiagaz, Abadiñoko San Trokaz eleizan, 19:30etan. Bietan, jente-kopurua mugatua izango da eta indarrean dagozan osasun neurri guztiak beteko dira.

Bihar, abenduak 27, urteko azken domeka, Familia Santuaren Eguna ospatuko dogu. “Adinekoak, Eleizaren eta gizartearen altxor” goiburua aukeratu dau Gotzainen Batzarreko Familia eta Biziaren Defentsarako Gotzain Azpibatzordeak aurtengo ekitaldirako. On Joseba Segura Eleizbarrutiko gotzain administratzailea buru dala ospatuko da bihar eguerdiko hamabietan Eukaristia Santiago katedralean eta web orrialde honetatik zuzenean eskainiko da.

Asier Odriozolak (‘Gizartelur’ ekimenaren sustatzaile) eta Nekane Narbaizak (‘Lapiko Catering’ ekimenaren gerentea) ‘ Alkarren Barri ’ eleizbarrutiko aldizkariaren azken alean azaldu dabez Bizkaiko Caritasek kudeatzen dituan gizarteratzerako enpresakaz batera martxan jarri dan ‘Ecoberri’ nekazaritza-ostalaritza egitasmo barriaren ingurukoak.

Bilboko errege-opil solidarioaren XVII. ekitaldia ospatuko da eta milaka zati banatuko dira datorren martitzenez, urtarrilak 5. Urte berezi honetan, banaketa hori Bilboko Euskal Museoan egingo da, baina ezinbestekoa da aldez aurretik txanda hartzea honako web orrialde honetan: www.rosconsolidriobilbao.org. Opil-zatiaren eta baso bete txokolatea jadesteko emon behar dan euroa egoera ahulean dagozan adin txikikoei aukerak eta bitartekoak emoteko izango da. Aurton, diru-laguntza honen bidez, batez be arrakala digitalari aurre egin gura jako, adin txikiko askok eta askok, familian bizi daben egoeraren eraginez, ezin dau-eta bitarteko digitalik eskuratu eta, ondorioz, gatxa egiten jake ikasketak jarraitzea.

Gaur Bizkaiko ea 300 parrokietan Jesusen Jaiotzea ospatu da. On Joseba Segura, Bilboko Santiago katedralean ospatu dan mezatako batzar burua izan da. Bere homilian gaurko egun honek daukan zentzunaz egin dau berba. Nahiz eta askorentzat "harrigarria izan", berbea haragi bihurtu zan eta Umea argia emotera etorri zan mundura. Horixe da hain zuzen gaur ospatzen danaren benetako zentzuna. Bere esanetan ez da garrantzitsua koprurua eta asko ala gitxi garean baizik eta egun honen zentzuna sakontasunez eta benetako fedez bizitzea da behinekoena, "hasierako artzain hareek bizi eben antzera", adierazo dau.

Alkarren Barri – Comunicación aldizkaria itxura, gai eta laguntzaile barriakaz atarako da urte barriaren hasieran. Urtarrilean etxeetara helduko dan hogeta hamar urteko agerkari hau euskarri digitalean be zabalduko da ikus-entzunezko edukiekin datorren astean web orrialde honetan. Urtarrilari dagokion 272. alean, ohiko irakurleek hainbat aldaketa nabarituko dabe, bai diseinuan, eta bai edukietan be, besteak beste, Lagungo Fundazinoaren, Ander Manterola etnografoaren edo zientzia eta fedearen inguruko gaiak eskainiko dituan Miguel Ramon Viguri Deustuko Unibertsitateko eta Elizbarrutiko Teologia Institutuko irakaslearen laguntzari esker. Horra hor, urte barriari ilusinoz eta gogoz heldu gura deutsan aldizkariaren aldi barrian izango diran aldaketetako batzuk. Urteko lehenengo alean, Eleizbarrutiaren 70. urteurrenari lotuta martxan jarri zan “aulki hutsa’ lehiaketaren irabazlearen izena be agertzen da: Marian Caselles CECO itsu katolikoen taldeko Bilboko arduradunak irabazi dau Kidendan prestatutako saskia. Zorionak, Marian!

Caritasek eta Lagungo Fundazinoak amestutako mahai- jolasa da. Balioetan hezitzeko helburuagaz eta familiagaz sentimentuak eta barruko grinak alkarbanatzeko aproposa da. `Hainbat jolasa´ deitzen da eta dagoeneko salgai dago. Bertsino digitala be lortu daiteke.

Gaur –abenduak 25, barikua-, Jaunaren Jaiotzaren egunez, On Joseba Segura Eleizbarrutiko gotzain administratzailea buru izango da Santiago katedralean eguerdiko hamabietan ospatuko dan Eukaristian. Zuzenean jarraitu ahal izango da web orrialde honetan eta Telebilbao katean. On Joseba Segura gotzainaren eta Fede-zabalkunde eta Katekesirako, Misinoetarako eta Caritaseko arduradunen Gabon-agurra, hemen .

Atzo, ohitureari jarrituz Gernikako Marijesiak 9etako mezatan kantau ebezan Jesusen jaiotzea iragarten daben koplak. Jesus Llarena, Elizbarrutiko Liturgiako arduradunak eta Marijesien taldeko partaidea batzar buru izan zan ospakizunean, Carlos Olabarri abadea be altarean zala egin zan ospakizuna. Denis Azkarte bakarlariak mezan zehar Gabonak iragarten dabezan koplak abestu ebazan. Mezea amaitzeko talde guztiak abestu ebazan Gabon egunari jagokozan bertsoak.