Arratsaldeko zazpiretan hasiko da on Joseba Segura buru dala Gaixoaren Munduko Eguneko Meza.

Garizumaldirako materialak Aurkezpena

Otsailaren 8an ospatu zan Pertsonen Salerosketaren aurkako Gotoeta eta Otoitzerako Munduko Egunaren inguruan, Migrazinoetarako Bilboko Eleizbarrutiko Mahaiaren eskutik berbaldia ospatuko da, gaur –otsailak 16-, online, 19:00etan, Maria Francisca Sanchez Vara Migrazinoetarako eta Giza Mobikortasunerako Gotzain Azpibatzordeko Idazkaritzako arduraduna hizlari dala. ‘ Alkarren Barri – Comunicación’ eleizbarrutiko aldizkariari eskaini barri deutsan alkarrizketan adierazo dauanez, “interes ekonomikoa erabakigarria da negozio honek iraun daian, izan be, kostu oso txikiak ditu eta egundoko irabaziak, esplotazino eta esklabotasunaren kontura”.

Gaur Irratiaren Munduko Eguna da. Hori dala-ta Elizbarrutiko irratietako estudioetara sartu gara euren "arimea" hobeto ezagutzeko asmoz. Bai Herri Irratiak zein Bizkaia Irratiak be ibilpide luzeko historia daukie. Lehenengoa orain 60 urte jaio zan eta bigarrenak 30 urte bete dauz. Zorionak biei orain arte egindako bideagatik. Gogoan daukaguz urteotan sendi handi honetako parte izan diranak be. Goian begoz!

IV. eta V. Bikaritzetako ( Durangaldea, Lea-Artibai, Busturialdea, Galdakao, Orozko) gaztetxo eta gazteen taldeetako pastoral eragile diran 80 gazte inguru alkartu ziran joan dan zapatuz, otsailak 13. “Jesukristo beri gazte” goiburuaren haritik, otoitz eta gogoeta egin dabe Bikaritza horreetako Pastoral Barruti guztietako eskaut eta kristau sarbideko taldeetako kideek. Beste alde batetik, asteburuan ospatu diran mezetan batutako dirua Esku Elkartuak erakundeak sustatzen dituan egitasmoetara zuzenduko da. Zapatuz, gainera, Irratiaren Nazinoarteko Eguna be ospatu zan eta Bizkaia Irratia eta Radio Popular-Herri Irratia eleizbarrutiko hedabideek euren ateak zabaldu ebezan, hainbat esatariri aurpegia jarteko aukera emonez.

Bigarren urtez jarraian, eta osasun egoera kontuan hartuta, prebentzinoa eta segurtasuna lehenetsiz, Bilboko Eleizbarrutiak bertan behera itzi ditu Aste Santuko ekitaldi publiko guztiak. On Mario Izeta gotzainak alarma egoera agindu zanean ezarri ebazan osasun neurriak indarrean dagoz gaur egun be Bizkaiko Eleizan, “edozein talde, mobimentu edo eleiz taldeko arduradunei aparteko jagoletza” eskaintzen jakelarik, Luis Alberto Loyo Kofradien Eleizbarrutiko Kontsiliarioak kaleratu dauan oharrean azaltzen dauanez. On Joseba Segura Eleizbarrutiko gotzain administratzaileagaz hitz egin ondoren eta “zuhurtziaz” jokatzeko, “bertan behera geratzen dira kultu-ekintza guztiak” kalean, hau da, “jentea pilatu daikien eta osasun arloko agintariek ezarritako tarte eta segurtasun neurriak gordetea gatx egiten daben prozesinoak eta irudien lekualdatzea”. Egoera hau kontuan hartuta, Bilboko kofradiek jardueren egitaraua egokitzen dihardue eta, besteak beste, ez dabe pausoen prozesinorik egingo kalean.

Bihar, otsailak 18, Ministerio Ordenatuaren VI. jardunaldia ospatuko da arlo horretaz arduratzen dan Idazkaritzaren eta Eleizbarrutiko Teologia eta Pastoraltza Institutuaren eskutik. Aurton, Mons. Luis Arguello Gotzainen Batzarreko Idazkari Nagusi eta bozeroale eta Valladolideko gotzain laguntzaileak jardungo dau abade eta diakonoen aurrean. Pandemiaren eraginez, aurtengo ekitaldian berbaldia eta ondorengo solasaldia baino ez dira ospatuko. Lagun arteko tartea gorde ahal izateko, jardunaldia Karmeneko Ama parrokiako areto nagusian ospatuko da goizeko 10:30etan. Ezinbestekoa da partaidetza egiaztatzea, idtp@idtp.org helbidera bialduz.

Otsailaren 17an, eguaztenez, Bizkaiko ea 300 parrokietan hautsa bedeinkatuko da eta lagun bakotxaren buru ganean jausten itxiko deutso. Garizumaldiari emongo jako hasierea modu horretara eta Bilboko katedralean, arratsaldeko zazpiretan, on Joseba Segura gotzain administratzailea izango da meza burua, arratsaldeko zazpiretan hasiko dan ospakizunean. Zuzen zuzenean emongo da eukaristia hori webgune honetatik. Bestalde, eguazten horretan, `Adiskide eta Senide´ deritxon kanpainaren materialak egongo dira eskuragai webgune honetan. Hilaren 22an ziklo honetako lehenengo bideoa, Imanol Zuberorena egongo da eskuragai eta martiaren 1ean bigarrena, on Joseba Segurarena. Hirugarrena martiaren 15ean ikusi ahal izango da. Azken honetan alkarte abegitsuen ganeko testigantza batzuk entzun ahal izango dira.

Atzo –otsailak 15, astelehena- azkenaldian ordenatu diran abade eta diakonoek heziketa-saioa izane ben Begoñako gogarte etxean. Pandemiaren eraginez indarrean dagozan osasun murrizketak kontuan hartuta, parte hartzea mugatuta egon zan.

Aste honetan be, hainbat barri jaso da eleizbarrutiaren web orrialdean. Hona hemen, aurrerapen lez, batzuen aitamena: Gaixoaren eguna; Esku Elkartuak erakundeak sustatzen dauan gosearen aurkako kanpaina; pertsonen salerosketaren inguruko erakusketaren lekualdaketa katedraleko klaustrotik Deustuko Unibertsitateko klaustrora; familiei zuzendutako heziketa Euskalerriko Eskautak Bizkaia eta Lagungo Fundazinoaren eskutik. Honeek eta beste hainbeste, www.bizkeliza.org orrialdean.