Atzo, eguaztena, Eusebio Sendino Terradillos eleizbarrutiko abadea hil zan 94 urteko zala. Bere arimaren aldeko hileta-eleizkizuna bihar –urriak 23, barikua-, ospatuko da arratsaldeko zazpietan Begoñako basilikan, On Joseba Segura gotzain laguntzailea buru dala.

Eusko Jaurlaritzako Osasun Sailburuak Xedapen Orokorrak argitaratu ditu gaur –urriak 23, barikua- Euskal Herriko Agintaritzaren Aldizkarian . Xedapen horreetan. COVID-19 pandemiak izan dauan bilakaeraren eraginez dogun egoerari aurre egite aldea, ezohiko prebentzino-neurriak jasoten dira Euskadiko Autonomia Erkidegorako. Kultu-etxeetan, esate baterako, ezingo da guztira batu daiteken jente kopuruaren erdia - %50- baino alkartu eta beila eta enterruetan gehienez 30 lagun batuko dira kalean eta 6 lagun leku itxietan.

“Bibliotecas siempre a tu lado / Zure ondoan beti”, goiburua ardaztzat hartuta, gaur –urriak 24, zapatua-, Liburutegien Eguna ospatzen da eta Derion kokatuta dagoan Eleizbarrutiko Liburutegitik Jaime Lopez Eguilaz arduradunak azaltzen dauanez, une berezi eta gatx honeetan bizi doguzan zailtasunak gainditu eta eleizbarrutitik gertu egon gura dabe liburuen bidez, “otoitz, ikasketa, heziketa, entretenimendurako bideak jarriz eta ondare bibliografikoa zainduz”.

Atzo Osasun Sailaren agindu barria argitaratu zan COVID-19aren egoerak eraginda. Xedapen barriek eragina daukie gure parrokietako lokaletako eginkizunetan zein kultuan edo segizioetan zein beilatokietan.

Ikasturte honetan Bilboko Elizbarrutia Gasteizkoagandik banatu zaneko 70. urteurrena ospatzen gabilz. Hasierak latzak izan ziran eta holan kontetan da Angel Mari Unzueta bikario nagusi ohiak Alkarren Barri aldizkarirako idatzi eban artikuluan.

Beste urte batez, Bizkaiko Eleizaren Historia Artxiboak , Bizkaiko Foru Aldundiak antolatzen dituan Ondarearen Europar Jardunaldietan parte hartzen dihardu. Batasun Europarraren eskutik Europako Batzordeak sustatzen dauan Kultura Ondarearen zabalkunderako egitasmo honek 20 urte bete ditu. Hezkuntzaren arloa da aurtengo ardatza eta Artxiboak “Parrokia eskolak, hezkuntza eta ikastetxean Bilboko eleizbarrutian: historia Artxiboaren ikuspuntutik” erakusketagaz bat egiten dau jardunaldi honeekaz.

Laugarren urtez jarraian, Ekuadorreko Riobambakoa dan Pablo Sanaguano artistarena da Pobreen Munduko Egunerako Bilboko Eleizbarrutian ikusiko dan kartelean agertuko dana. Margolana bat dator aita santuak laugarren ekitaldi honetarako kaleratu dauan mezuagaz: “Tiende la mano – Emon bostekoa”. Bilboko Eleizbarrutiak jarduera zehatz bi proposatu ditu datorren azaroaren 15erako mundu osoko Eleizak ospatuko dauan egunerako. Jarduera horreetako bat, bezperetan hasiko dira egiten parrokia eta Pastoral Barrutietan, eta ahulenei laguntzeko hartuko diran konpromiso zehatzak jasoko dituan murala egitean datza. Domekaz, alkarte Eukaristiaren ostean, euren paperezko eskuak muralean itsasteko eskatuko jake partaideei. Era beran, egun bateko soldata emotea proposatzen da, “krisiaren astindurik latzena jasaten daben” pertsonei –bizileku bakoak, langabetuak, etorkina, baliabide bako nagusiak, gaixoak, Hegoaldeko pertsonak…- lagutnzeko.

Aurreko urteetan lez, Euskalitek aurten be ospatukoko dau Aste berezi hau –barikuz amaituko da-, hain zuzen be 26. ekitaldia. Azken egunean, Bilboko Eleizbarrutiak parte hartuko dau online egingo diran alkarrizketen bidez, “eraldaketa digitala gizarte aldaketen aurrean” gaiaren inguruan. Eleizbarrutiko hainbat ordezkarik azalduko dau zelan burutu dan eraldaketa digital hau lan eremu desbardinetan, besteak beste, Caritasen, pastoralgintzan, komunikazinoan, parrokietan,…, horretarako garatutako oinarri teknologikoak aitatzeaz batera. Zuzenean emongo da ekitaldia web orrialde honetan, datorren barikuz, urriak 30, goizeko 10:00etan.

Joan dan zapatuz, urriak 24, Eleizbarrutietako Misinoek, Bizkaiko Caritasek eta Eleizbarrutiko Teologia eta Pastoraltza Insititutuak (ETPI) antolatzen daben Iparralde-Hegoaldea ikastaroa jarri da martxan gure Eleizbarrutian. Aurton, 11 lagunek emon dabe izena eta, aurreko ekitaldietan lez, lehenengo saioan, Hegoa erakundeko kide dan Patxi Zabalok esku-hartu dau, munduko gizarte-ekonomiaren osoko ikuspuntua eta Iparraldearen eta Hegoaldearen arteko aldeak eskainiz.

Eleizbarrutiko Teologia eta Pastoraltza Institutuak (ETPI) bere 40. urteurrena ospatzeko ekitaldi nagusia egin eban atzo Indautxuko Karmeneko Ama parrokiako areto nagusian. Ekitaldiaren hasieran, Komunikabideetarako Eleizbarrutiko Sailak prestatutako bideoa proiektatu zan, eleizbarrutiko erakunde honen aldien ingurukoak azaldu ebazan institutuko hainbat zuzendariren berbakaz. Bideoa ikusi ondoren, mahai-ingurua ospatu zan, Lander Intxausti BAMeko irakaslea moderatzaile lanetan zala, honako honeen partaidetzagaz: Miguel Zugaza Bilboko Arte Ederretako Museoko zuzendaria; Raquel Perez Hezkuntzarako Gotzainen Batzarreko zuzendaria eta Javier Vitoria teologo eta ETPIko zuzendari ohia. Urteurreneko ekitaldian izan ziran, besteak beste, On Mario Izeta Burgoseko artzapezpiku hautatu eta Bilboko Eleizbarrutiko Administratzaile Apostolikoa, On Joseba Segura gotzain laguntzailea, Carlos Garcia de Andoin ETPIko zuzendaria, Lorea Bilbao Bizkaiko Foru Aldundiko Kultura Diputatua eta ETPIko hainbat zuzendari ohi.