Aste honetan be, hainbat barri jaso da eleizbarrutiaren web orrialdean. Hona hemen, aurrerapen lez, batzuen aitamena: Gaixoaren eguna; Esku Elkartuak erakundeak sustatzen dauan gosearen aurkako kanpaina; pertsonen salerosketaren inguruko erakusketaren lekualdaketa katedraleko klaustrotik Deustuko Unibertsitateko klaustrora; familiei zuzendutako heziketa Euskalerriko Eskautak Bizkaia eta Lagungo Fundazinoaren eskutik. Honeek eta beste hainbeste, www.bizkeliza.org orrialdean.

Atzo emon jakon hasiera Garizuma aldiari, parrokietan hautsa ezartzeko egin ziran ospakizunetan. On Joseba Segura Eleizbarrutiko gotzain administratzailea Bilboko katedralean ospatu zan Hausterre eguneko alkar-mezan izan zan buru. Argazkiak, hemen .

G otzainen Batzarreko Idazkari Nagusi eta Valladolideko Eleizbarrutiko gotzain laguntzaileak berbaldia eskaini deutse gaur Bilboko Eleizbarrutiko abade eta diakonoei. Besteak beste, gaur egun pil-pilean dagoan immatrikulazinoen kontuari buruz hitz egin dau. Bere esanetan, Espainian 23.000 parrokia dagoz eta Eleiza, historian zehar, ondasun askoren gordetzaile izan da, “gehienak kultuari lotuta”. Dana dala, nabarmendu dauanez, Gobernuak Parlamentuari aurkeztu deutsan txostenean jasoten danez, ondasun honeek zuzenbidearen arabera immatrikulatu dira eta, gainera, “prozesuan jabetzaren erregistratzaileen bermea dogu”. Adierazo dauanez, gainera, ondasunen bat –“nire ustez gitxiengoak izango dira”- immatrikulatu bada eta gaur egun jabari publikokoa bada, “ kasu horretan, jakina, erraza da kontuari heldu eta immatrikulazinoaren ikuspuntutik egin beharko litzatekena lehengoratzea”. Honen haritik, Jose Maria Ziarrusta Bilboko Eleizbarrutiko gerenteak Bizkaia Irratiari eskainitako alkarrizketan nabarmendu dauanez, “Bizkaiko Eleizak ez dau berea ez dan ezer erregistratuta euki gura”.

“Adiskide eta senide. Comunidades acogedoras” ekimena garatuko da gaur –otsailak 17, Hausterre eguna- hasiko dan Garizuma aldian eta hainbat bide eskaintzen jake parte hartu gura daben parrokia, talde edo norbanakoei. Hausterre eguneko ospakizunetan emongo jako hasiera kanpainari Bizkaiko parrokietan. Bilbon, On Joseba Segura Eleizbarrutiko gotzain administratzailea izango da buru Santiago katedralean 19:00etan ospatuko dan eleizkizunean. Era bateko edo besteko arrazoiengaitik bertara joaterik ez dabenek zuzenean jarraitu ahal izango dabe Eukaristia web orrialde honen bidez. Beste alde batetik, Bizkaiko kristau alkarteek eskuratu daikiez gizarte, karidade eta misiolari konpromisoan sakontzeko prestatu diran lagungarriak . Datorren astelehenez, otsailak 22, eskaintza horri Imanol Zubero soziologo eta Euskal Herriko Unibertsitateko irakasleak gaiaren inguruan eskainitako online berbaldia gehituko jako.

On Luis Arguello Valladolideko gotzain laguntzaile eta Gotzainen Batzarreko idazkari nagusiak Bilboko Eleizbarrutiko abade eta diakonoen aurrean jardun eban atzo, “Ekologia, ebanjelizazinoa eta ministerio ordenatua” gaiaren inguruan. Laudato si agiria izan eban gogoan eta baita aita santuak ikuspuntu ekologikotik eta osoko bihurtzeari begira, hau da, “senidetasunari, justiziari, gizon eta emakume bakotxaren duintasunari” begira, fedetik egiten dituan proposamenak be.

Pandemia hedatu zanetik ohiko bihurtu danez, katedralean, domekero, eguerdiko 12:00etan ospatzen dan Eukaristia zuzenean jarraitu daiteke web orrialde honetatik, youtube kanaletik eta Telebilbao katetik. Bardin jarraituko dogu Garizuma aldian be eta, horregaitik, dei egiten deutsuegu gure youtube kanalean izena emon daizuen, holan, emonaldia dagoan bakotxean, oharra helduko jatzue jakinaraziz. Izena emoteko: hemen.

Bihar –otsailak 20, zapatua-, Bilboko Eleizbarrutiak zazpigarren Bake Topaketa ospatuko dau, bake eta adiskidetzerako sailaren eskutik. Aurton, ohiko jardunbideagaz alderatuz, formatu mistoan egingo dala esan daiteke, hau da, taldeak euren alkarteetan batuko dira eta online be egingo da. Goizeko hamarretan, web orrialde honetatik, besteak beste, Lourdes Oñederra idazle, irakasle eta Euskaltzainak Buesa Fundazinoaren ekitaldi batean eskaini eban berbaldia jasoten dauan bideoa ikusi ahal izango da. Aldi berean, Bizkaiko hainbat parrokiatako 11 talde batuko dira bideoa ikusteko eta Bake Topaketak ekitaldi honetarako egin dauan proposamenaren inguruan gogoeta egiteko, hau da, “oroimena belaunaldi gazteei helarazteko bideak”, dalakoaren inguruan.

Gaur goizean Bizkaiko Eleizeak VII. Bake Topaketa ospatu dau bizi dogun osasun egoerara egokituta. Elizbarrutiko herri batzuetan beharrezkoak diran neurriak zainduz, taldeka batu dira egunerako beren beregi prestau dan bideoa ikusteko. Durango, Elorrio, Astrabudua, Bilbo eta Sestao izan dira topalekuak. Gainontzean ehun bat lagun batu dira online hausnarketarako jardunaldian parte hartzeko. Belaunaldi ugaritako jentea batu da eta aukerea egon da Lourdes Oñederraren eta terrorismoaren biktimak izan diran familiarteko batzuren testigantzak entzuteko. On Joseba Segura gotzain administratzaileak emon deutso ondo etorria ekitaldiari eta honetan, gogoan hartu dau 2020ko azaroan hildako Angel Mari Unzueta, topaketa honeetako bultzatzaile sutsua. Titular ugari itxi dauz gaurko ekitaldiak parte hartu dabenen artean eta bata goiburuan batu dan hau da: "Bizkaiko Eleizeak ez dau gura memoriaren karpeta itxi". Gaurko egun honegaz batera azken hamarkadan Bilboko Elizbarrutian arlo honetan egin diran ekimenak batzen dauazan dossierra aurkeztu da.

Gaur, bake eta adiskidetzearen aldeko topaketaren zazpigarren ekitaldia ospatzen dan egunean, azken hamarkadan, Blboko Eleizbarrutian gai honen inguruan garatu izan dan hainbat jardueraren bideo eta argazkiak batzen dituan agerkaria aurkeztu dau komunikabideetarako sailak, jakin-mina daben pertsona guztientzat eskuragarri. Agerkari honetan jasoten diran ekimen guztiak eleizbarrutiko aldizkarian jaso ziran bere egunean. Horreetakoren bat, gainera, esate baterako On Joan Maria Uriarte eta On Mario Izeta gotzainen arteko solasaldia, joan dan azaroan hil zan Angel Mari Unzueta bikario nagusi ohiak zuzendu ebana, beren-beregi ‘Alkarren Barri – Comunicación’ aldizkarirako prestatu zan. Bildumaren atzeko azalean, Unzueta lez, Elizbarrutian “adiskidetzerako bitartekari” izan diran pertsona guztien lana autortzen da.

Alkarteetan batuz eta era telematikoan ospatuko dan 2021eko Bake Topaketa, On Luis Arguello gotzainak abade eta diakonoei eskaini deutsen berbaldia eta Garizuma aldiaren hasiera agertu dira, besteak beste, web orrialdean. Honeek eta beste barri batzuk ikusteko: www.bizkeliza.org