Bilboko Elizbarrutiak alegazinoak aurkeztu deutsoz Eusko Jaurlaritzako Kultura Ondarearen Zuzendaritzari, Gaztelugatxeko San Juan Babes Bereziko Kultur Ondasun izendatzeko adierazpenaren inguruan. Tokia Monumentu Multzo izendatzea eta bereziki, ` Gaztelugatxeko San Juaneko Santutegiaren Multzo Erlijioso Aparta´ modura izendatzea eskatzen da idazkian. Inguruaren izaera erlijiosoa kontuan hartzeko eskatzen da berau dalako “ apartekotasuna eta ezaugarria ” emoten deutsona. Horregaitik, hauxe litzateke babestu beharreko balio nagusia.

Abuztuaren amaieran azken urteotan erromesaldia egiten dabe abadegaiek eta Seminarioan dagozan hezitzaileak gotzainagaz batera. Gaur urten dabe aste beteko txangoa egiteko Kantabria, Asturias, Leon, Valladolid eta Palentzian amaitzeko. Oviedo eta Valladolideko gotzainakaz. on Jesus Sanz eta on Ricardo Blaquezegaz ospatuko dabez mezak lurralde horreetara iristean.

Gaur Santa Monika eguna da eta bihar, San Agustin. Begoñan dagozan monja agustindarrek egun bi honeek modu berezian ospatzen dabez. Gaur goizeko bederatzietan euki dabe mezea erlijioso agustindar bat buru zala. Bihar, arratsaldeko zazpiretan on Mario Izeta gotzaina egongo da bertan mezea eurekaz ospatzen. Bien bitartean monjek otoitzean eta lanean jarraitzen dabe euren ortuan eta eleizetarako formak prestetan.

Gaur Eleizeak San Juan Doloz eguna ospatzen dau. Jai handia izaten da Bakio eta Bermeoko eleiztarrentzat. Izan be, egun hau ekainean ospatzen dan San Juan Bateatzailaren jaiagaz batera izaten da sinisdun gehien batzen dauazan eguna ermitan. Ekaineko erromesaldian mezak goizeko sei ta erdietatik aurrera orduro egoten dira eta gaurko honetan ohikoa da meza bi ospatzea. Aurton, baina pandemia dala-ta Bermeoko fraileek zein udaletxeak eta inguruan zaindu eta babesten arduratzen diran boluntario alkartekoak mezak bertan behera iztea erabagi dabe . " Badaezpada, eleizea txikia dalako ".

Koronabirusak agenda ugari aldatu dauz, besteak beste, gaurko eta biharko Mañaria eta Abadiñoko eliztarrek egiten izan daben erromesaldia Urkiolako santutegiraino. Aspaldiko ohitura erlijiosoa bertan behera geratu da aurton. Izurtzakoek be ez eben ospatu San Roke egunez egiten izan dabena. Abadiñoko udalak be bertan behera itxi dau jubilauentzat biharko egunez, meza ostean, antolatzen izan dauan bazkaria.

Zapatu honetan, abuztuak 29an, Gordexolan San Juan eguneko jaien barruan, inguruan 12 urtez parroko modura jardun dauen Trinitario Alvarez `Trino´ren agurreko elizkizuna egin zan. Jubilau egiten dala-ta, lekukoa hartu deutsie Oscar Gonzalez parrokoak eta Alberto Jaimez, diakonoak. Ezaugarri berezi bi egon ziran ospakizunean: ebanjelioen esku aldatzea eta sagrarioaren giltzen emotea. Kerman Lopez lurraldeko bikarioa egon zan bertan eliztarren alkartearekin batera.

Javier Berasaluce abadea atzo, abuztuak 27an hil zan Urdulizen. Igorren jaio zan 1939an. Abade 1965ean egin zan eta bere lehenengo zerbitzua Trianon egin eban. Ostean Uribe-Kostan egon da hil arte. Lehenengo Armintzan eta Lemoizen eta 1979etik Urdulizen. Bere aldeko hileta elizkizuna bertan izango da gaur arratsaldeko 20retan. Borja Uriarte, inguruko abadeak dino beragaitik "txantxazalea eta hurreko personea zala".

Bilboko Santiago katedralean hasi, Euskal Museoko eta Eleiz Museoko klaustroak ikusi eta handik Bermeoko frantziskotarren komentukora joan gaitekez egun pasa eta toki ikusgarriak ikusten. Urdaibaitik Lea-Artibaira. Han Ziortzako klaustroa be ikusgarria da.

Jose Maria Urlezaga Errigoitiko semeak Arratzun emon eban bere bizitza pastoralaren zati handi bat, Belendizeko San Pelayo eta Santo Tomas parrokietako eleiztarrakaz. Busturialdean, “danei laguntzeko eta gaixoen ondoan egoteko prest egoan” gizona zala dinoe. Gazteengandik gertu egoan eta “ katekesia emoten eutsen edo sendotza hartzeko prestatzen ebazan”; nagusiengandik be gertu egoan, “domekero Gernikako Torrezuri egoitzan egozanak bisitatuz”. Gernikako mesedetakoen eta klaratarren kapilau izan zan. 2013an, osasun-arazoek eraginda, Begoñako Beneragarrien Etxera joan zan eta hantxe hil zan joan dan domekaz, abuztuak 30. Gaur, irailak 1, bere arimaren aldeko hileta-eleizkizuna ospatuko da Gernikako Andra Mari eleizan, arratsaldeko zazpietan.

San Antolin eguna dala-eta, gaur –irailak 2, eguaztena- Meza Nagusia ospatuko da arratsaldeko zazpietan, Irauregin (Alonsotegi). Honen ostean, 19:45 inguruan, aurretik eleizkizunean parte hartuko dauan Bilboko Katedraleko musika-kaperak (abesbatza eta ganbara-orkestra) kontzertua eskainiko dau. Aurton, ezohiko eran eta osasun-segurtasunerako arauak betetze aldera, San Bartolome parrokian ospatuko da Meza, San Antolin eleizan jente gitxi (18 lagun) sartzen dalako eta eraikinak ez dituelako baldintzak beteten aireztatze eta lekuari dagokionez.