Maria Francisca Sanchez Vara Migrazinoetarako eta Giza Mobikortasunerako Gotzan Azpibatzordeko zuzendariak berbaldia eskainiko dau online azaroaren 16an, Deustuko Unibertsitatean, Migrazinoetarako Eleizbarrutiko Mahaiak antolatuta. Eleizak gaur ospatzen diharduan Pertsonen salerosketarena urkako Munduko Gogoeta eta Otoitz eguna dala-eta, pertsonen salerosketaren inguruan jardungo dau. Eleizbarrutiko aldizkariari eskainitako alkarrizketan , hainbat datu eskaini dau horren inguruan, besteak beste, esanez: “interes ekonomikoa erabakigarria da negozio hau egon daiten, kostu oso txikiak eta irabazi ikaragarriak ditualako, esplotazino eta esklabotasunaren kontura”.

Gaur ospatzen dogu Giza Senidetasunaren Nazinoarteko Lehenengo Eguna. Nazino Batuen Batzar Nagusiak deitutako egun honetan, hauxe gogoratu gura da: orain dala urte bi Frantzisko aita santuak eta musulman sunnien erreferentzia nagusi eta Al-Azharreko iman nagusi dan Ahmad Al-Tayyebek Munduko Bakearen eta Alkarbizitzaren aldeko Giza Senidetasunari buruz sinatu eben agiria . Orain dala hilebete batzuk Fratelli Tutti entziklika kaleratu eban Frantzisko aita santuak ospakizunagaz bat egiteko esan dau. Bere aldetik On Joseba Segura Eleizbarrutiko gotzain administratzaileak Fratelli Tutti entziklikari buruzko berbaldiak emoten dihardu Eleizbarrutian eta datorren astean Portugaleten (otsailak 10, eguaztena, 19:00etan), eta Zaldibarren (otsailak 12, barikua, 18:00etan) izango da. Bestalde, `Adiskide eta Senide- Comunidades Acogedoras´ deritxon Garizumako kanpainan be on Joseba Segurak entziklikaren inguruko hausnarketea egingo da eta webgune honetan bertan jarriko da.

HOAC mobimentuaren Bizkaiko ordezkaritzak berrogei lagun inguru batu zan joan dan zapatuz bide telematikoz batzar nagusia ospatzeko. Marisa Arias Laikotzarako Idazkaritzako zuzendariak be bat egin eban eurakaz. Mobimentutik azaldu dabenez, luze eta zabal jardun eben Eleizbarrutiko ordezkaritzak uda honetan ospatzekotan ziran eta pandemiaren eraginez atzeratu egin dan HOAC mobimentuaren XIV. Batzar Nagusian egingo deutsan ekarpenaren inguruan.

Bihar, otsailak 7 eta hurrengo domeka bietan –otsailak 14 eta 21-, Laukizeko San Martin parrokiatik emongo dabe Eukaristia ETB1ean, goizeko hamarretan. Iñaki San Nicolas eta Mateo Larrauri fraile klaretarrak izango dira buru ospakizunetan. Parrokiako abesbatzak girotuko dau liturgia eta Jose Antonio Uriartek joko dau organoa. Lontzo Zugazaga abadeak egingo dau aurrerantzean joan dan azaroan hil zan Angel Mari Unzueta k Eukaristiaren aurretik egiten eban sarrera eta, kasu honetan, Uribe-Butroi eskualdean dagoan udalerriaren alderdi sozial, artistiko eta erlijiosoen inguruan jardungo dau.

Aste honetan, eleizbarrutiko orrialdean hainbat barri jaso da, besteak beste: Kandelerio, San Blas eta Agate Deunaren egunak, danak be pandemiak baldintzatuta; pertsonen salerosketaren inguruko erakusketaren inaugurazinoa Santiago katedraleko klaustroan; bokazino pastoraltzarako "P.R.A.Y. Station" ekimenaren lehenengo saioa edo Biziera Sagaratuaren eguna. Barri honeek eta beste hainbat hemen: www.bizkeliza.org

Pandemia egoeran gazteei zuzendutako akonpainamendu emozionalaren inguruan sentiberatasuna bizteko eta horretarako bitartekoak eskaintzeko, Euskalerriko Eskautak Bizkaia eta Lagungok heziketa eskainiko dabe familientzat. Online jarraitu daiteke gaur –otsailak 9, martitzena-, arratsaldeko bostetan edo bihar –otsailak 10, eguaztena-, goizeko hamaiketan.

Aste honetan, berbaldi bi iragarrita egozan beste hainbat parrokiatan Fratelli tutti entziklikari buruz, On Joseba Segura Eleizbarrutiko gotzain administratzailea hizlari lanetan zala. Bihar, Portugaleten ospatzekotan ziran berbaldia atzeratu egin behar izan dabe eremu gorrian dagozalako (jakinarazoko dogu zein egunetan egingo dan). Datorren barikuz , eta jente gehiago batu daitekelako, Zaldibarren ez ezik, E rmuko Santiago Apostolua parrokian izango da, arratsaldeko seietatik aurrera. Gotzainak, gainera, Frantzisko aita santuaren entziklikaren inguruko berbaldia eskainiko dau online “Adiskide eta senide – Comunidades acogedoras” Garizuma aldirako ekimenaren barruan eskainiko diran saioen barruan, web orrialde honetan bertan, otsailaren 22tik aurrera.