Ibon Perez Lekeitioko kazetariak izenpetzen dau `MuyHistoria´ aldizkariak uztailean San Nikolas edo Garraitz ugartearen inguruan azaltzen dan arkeologiaren inguruko dossierra. Ugartean Bariko San Nikolasi eskainitako ermitea egon zan eta XVII. mendean fraileen komentu bihurtu zan. Izurriteak jotakoak egoteko tokia be izan zan sasoi baten eta militarren tokia be. Pasarte ugari ezagutu dauz ugarte honek baina berau ikertzen dabiltzanak ez dabe gorpuen arrastorik aurkitu.

Asteotan amaituko dira Derioko Seminario eraikinean egin beharreko egokitzapen lan guztiak datorren irailaren 1ean BAMeko ikasleek eskolak bertan hasi daiezen. Lehenago be Derion egon zan Irakaslego Eskolea 1973tik 1993ra eta bertan izango da harik eta Barrainkuako gaur egungo egoitzan eraikin barria eregi arte. Eskoleagaz batera bertako patioan dagozan palmera biak be eroango dabez Derioko Adiskidetasunaren Basora bertan landatzeko.

Azken urteotan, “ Urdaibaiko Organoak-Joxe Mari Eguileo r” musika-jaialdia Busturialdea-Urdaibai eskualdeko eta Bizkaiko kultur ekitaldi garrantzitsuenetako bat bihurtu da. Baina koronabirusaren hedapenak eragindako osasun-krisia dala-ta, Urremendi Landa Garapen Elkartetik, 2020ko uda honetan ospatu behar zan jaialdi hau bertan behera iztea erabaki dabe. Aurtongo nobedade bat zan Lumoko San Pedro eleizan oraintsu barriztautako organoagaz kontzertua emongo zala. Konponketea Gondra Barandiaran Fundazinoak ordaindu dau eta urte amaierako bere osotasunean egongo da barriztauta.

San Lorentzo eguna da gaur. Liburuzainen zaindaria, besteak beste. Hori dala-ta Elizbarrutian dagozan lau liburutegietatik txangoa egiteko konbitea egiten deutsugu. Euren arteko hiru Derion dagoz kokatuta, Seminario eraikinean: Euskal Biblioteka, Elizbarrutiko biblioteka eta Magisteritza Eskolakoa. Laugarrena, Teologia eta Pastoraltza Institutukoa, Bilbon dago. Behin Barrainkuan, egoitza bakarra eraikitzen danean, liburutegi guztiak bertan izango dira orain arteko modukoan, gizartearen zerbitzura eta Bilbon. Honen ganeko informazino osotuagoa hemen: https://sway.office.com/eOCNESrkLuc2nxH8.

Datorren abuztuaren 20an ospatuko da uztailaren 28an gaixotasun luze baten ondorioz hil zan Isaac Totorikaren aldeko mezea Ziortzan, bertako alkarteko lehenengo nagusia izan zan komentuan. Eguerdiko hamabietan izango da ospakizuna zister ordenarentzat hain garrantzitsua dan egunean, San Bernardoren jai liturgikoan hain zuzen be. Ermuan, bere jaioterrian be ospatuko da bere aldeko elizkizuna , baina oraindino ez dago datarik jarrita.

Pasiotarren webgunean azaltzen dabenez aurreko barikuan, arratsaldeko zazpiretan, Basurtuko ospitalera eroan eben alkarteko Erizaintza arloan egoan 90 urteko erlijioso bat COVID-19ko PCR probea egin ostean positibo emon ebalako. Hori dala-ta Osakidetzaren aholkuak jarraituz, alkarteko kideei eta bertan lanean diharduenei gaur bertan probak egingo deutsiez eta ondorengo egunetan berrogei aldiari ekin beharko deutsie. Guztira 40 bat laguni egingo deutsie gaur lehenengo probea eta datorren astean, bigarrena.

Abuztuko domeka honeetan gure ondare erlijiosoa ezagutzeko ibilbide batzuk proposatzen deutsueguz. Familiagaz egiteko modukoak dira. COVID-19ak gure aisialdia eta bizitzeko erea aldatu deuskuzan honetan, astegoienak ingurumenagaz eta kulturagaz bat eginik igarotzeko aukera barriak harrapatzen jarraitzen dogu. Hau izan daiteke honeen arteko bat. Nahi dozuz ezagutu Bilboko alde zaharrean dagozan toki esanguratsuak eta euren historia jakin? .

Arratiako webgunetik aditzera emon dabenez, edizinoaren azken xehetasunen faltan, dagoeneko amaituta dago 9 minutuko iraupena dauen "Gorbeia 2020 San Inazio" film laburra. Bertan, Gorbeia mendiaren magalean urtero ospatzen dan San Inazioren ospakizuna jasoten da, Igiriñaoko zelaietan. Iker Barrutieta errealizatzailearen lanaren aurkezpena Igorren egingo da abuztuaren 14an .

Durangon, Gernikan eta Derion dagozan klausurako monja klaretarrek euren eguna ospatuko dabe gaur. Asisko Klararen eguna da eta bera izan zan ordenaren sortzailea. Gaur baina, osasun egoerea dala-ta modu berezian biziko dabe eguna. Durangon mezea goizeko bederatzietan ospatu dabe baina ez dabez ohiko bedeinkatutako ogitxoak banandu mezatara joan diranen artean. Gernikan goizean ospatu dabe mezea alkartean eta arratsaldez ez da ospakizun publikorik egongo. Derioko Artebakarran eguerdiko 12etan ospatuko dabe mezea eta Instagramez emongo dabe zuzenean euren kontutik: elcieloenlatierra_ eta arratsaldeko zortziretan ospatuko dabe hurrengo mezea sinisdunakaz.

Gaur Amabirjinaren egunari begira Begoñan ospatuko diran zortzi mezen arteko lehenengoa egongo da arratsaldeko zazpiretan. Biharko lehenenengoa goizeko seiretan izango da, on Joseba Segura gotzain laguntzailea burua dala. Biharko Meza Nagusia, on Mario Izeta gotzaina buru dala ospatuko dana, beteta dago dagoeneko. Goizeko 10etakorako be ez dago lekurik. Gainontzeko mezetan izena emoteko epea zabalik dago oraindino be webgune honetan. Bihar, toki batzuk libre geratuko balira, aldez aurretik nortasun agiria erakutsita sartu ahal izango da, beti be, leku guztiak bete arte. Meza guztiak zuzenean eskainiko dira bertotikk.