Datorren asteburuan Eleizak Haur Misiolarien eguna ospatuko dau, “Nazareteko Jesusegaz, familia gara!” goiburuaren haritik. Feli Martin Misinoetarako Bilboko Eleizbarrutiko ordezkariak egun horretarako idatzi dauan gutunean esan dauanez, Haur Misiolarien eguna (urtarrilak 17) “omenaldia egin gura deutsegu euren bizitza eta lana mundu osoko familiakaz bat eginik garatzen daben misiolariei. Euren istorio eder eta hunkigarriak ezagutu nahi izan ezkero, gure web orrialdera jo: www.infanciamisionera.es "

Frantzisko Aita Santuak, Emakumeak irakurle eta akolito ministerioan jardutearen inguruan argitaratu barri dauan Spiritus Domini gutun apostolikoari buruzko azalpenak emon deuskuz Felix Alonso aurreko Eleizbarrutiko bikario nagusiak.

Ziortza aldean, asko maite dabez monasterioko monje zistertarrak eta “hartu-emon oso ona” dago herritarren eta fraileen artean, besteak beste, “monasterioak bizitasuna emoten deutsalako eskualdeari”. Orain arte, ostatua eskaintzen eutsen erromesei eta monasteriora otoitz edo gogoeta egitera hurreratzen ziranei eta orain beste jarduera bat be badabe, jantzi liturgikoak egiten hasi dira-eta. “Comunicación / Alkarren Barri” eleizbarrutiko aldizkariaren azken alean irakurri daiteke monjeei egindako erreportaje/alkarrizketa: hemen .

Jainkozko Gurtzarako eta Sakramentuen Diziplinarako Kongregazinoak oharra kaleratu eban atzo, pandemiak jotako urte honetan hautsa ezartzearen inguruan. Jarraibideak eskaintzen dira Hausterre egunez, otsailak 17, fededun eta abadeen segurtasuna bermatze aldera, zelan jardun esateko.

Bilboko Eleizbarruriaren web orrialdean eguneratu dira alarma-egoera aldarrikatu ondorengo testuinguruan urtarrilaren 12ko Aginduan argitaratu diran prebentzinorako berariazko neurriak. Baimendutako aforoei dagokienez, aurretik argitaratutako xedapenei eusten jake: %35 ospakizunetan eta %50 jarduera pastoral eta kulturaletan. Aldi berean, eutsi egingo jako herritarrak Euskadiko Autonomia Erkidegoaren lurraldetik eta bizileku dan Lurralde Historikotik urteteko eta sartzeko murrizketari. Gainera, a zken 14 egunetan COVID-19 positiboen Metatutako Intzidentzia Tasa 100.000 biztanleko 500 kasu edo gehiagokoa daben udalerrietan be mugatuta egongo da herritarren sartu-urtena. Joan-etorria ezinbestekoa bada, interesatuak agiri bat sinatu beharko dau eta jasotako baldintzak beteten dituala adieraziko dau erantzukizunez. Agiria hemen .

Pandemia hedatu zanetik, makina bat jarduera kultural, ludiko edo erlijioso atzeratu edo bertan behera itzi da, esate baterako, Bilboko San Anton eleizan aspalditik egiten dan animalien bedeinkazinorako ohikunea. Luis Alberto Loyo abade arduradunak iragarri dauanez, gizaldi honetan lehenengo aldiz jarduera hau bertan behera iztea erabagi dabe, “osasun-egoeraren eraginez”. Bizkaiko hainbat lekutan gordeten dabe ohitura hau baina, guztien gainetik, Bilboko San Anton eta Urkiolako santutegia nabarmentzen dira. Azken honetan, eguraldia lagun bada, eguerdiko hamabietan ospatuko da meza eta ostean Antonio Madinabeitia misiolariak animaliak bedeinkatuko ditu kanpoaldean, osasun-arauak betez. Oraindik edurra dago Anbotoren magalean baina Felix Moreno Abadetxeko arduradunak esan dauanez, errepidea eta aparkalekua garbitu dabez domekaz Urkiolara doazanek arazorik izan ez daien.

San Blas eguna laster izango dala-ta –otsailak 3, eguaztena-, covid-19a pandemiaren eraginez indarrean dagozan osasun-neurriak kontuan hartuta, Alde Zaharra Pastoral Barrutiko (PB) ekipo ministerialak oharra kaleratu dau, Bilboko Bariko San Nikolas parrokian egiten diran bedeinkazino-ohikuneak bertan behera geratzen dirala jakitera emonez. Egun horretan, dana dala, eleiza zabalik egongo da eta fededunek, ordenan eta ezarritako aforoaren arabera, eleizan sartzeko aukera izango dabe goizeko 10:00etatik 13:30etara eta arratsaldeko 17:30etatik 19:00etara.

Hainbat hilebeteren ostean, hemen da barriro ‘Astekoak’, astean zehar eleizbarrutiaren web orrialdean argitaratutako barrien laburpena. Urtarrilaren 11tik 17rako aste honetan, besteak beste, albiste izan dira honako honeek: Ander Manterola abadearen eskutik, ‘Alkarren Barri’ aldizkarian idazki erara eta eleizbarrutiaren ‘Youtube’ kanalean bideo erara jasoko dan Baskoniako Atlas Ernogragikoa; Bilbon, San Antonio Abataren egunez eta San Blas egunez ez dala hurrenez hurren ez animalien bedeinkazinorik ez kordoien bedeinkazinorik egingo eta Ziortzako monjeek martxan jarri daben jarduera barria: jantzi liturgikoak diseinatu eta egin. Honako barri honeek eta beste hainbat www.bizkeliza.org eleizbarrutiaren web orrialdean.

Carlos Bargos Bizkaiko Caritaseko zuzendariak eta Santi Larrañaga Begoñako Andra Mari Irakasleen Unibertsitate Eskolako (BAM) zuzendariak lankidetza-hitzarmena sinatu dabe gaur goizez eta honen bidez BAMek laguntza emongo deutso Bizkaiko Caritasek etorkinakaz garatzen dauan gizarte ekintzari. Etorkinak gizartean txertatzea lortzeko jardueren garapenean lankidetza sustatzea da hitzarmenaren helburua, izan be, egitasmoan partaide diran gazteentzat egundoko bultzada da gizartean txertatzeko bide horretan, hizkuntza ezagutzea funtsezkoa da-eta euren etorkizunerako.