Gaur Orueko Pasiotarren parrokian arratsaldeko seiretan izango da Jabi Jaioren aldeko gorpu aurreko hileta elizkizuna. Hil kapera eleizan bertan egongo da goizeko 11etatik 13:30etara eta arratsaldez, 16retatik 18retara. Pasiotarrak hutsune handia izten dau leku askotan. Ezpanetan beti irribarrea eukana, lagunen laguna, apala eta herritarrengandik hur egoana zala dinoe ezagutzen ebenak. Hona hemen Zornotzako Andra Mari Parrokiak , ` Gogoeta Astea ´ beragaz batera antolatzen ebenek, ` Bizian Gora ´ Nagusien alkartean eta ume-umetatik ezagutzen izan dauan Anton Mari Aldekoa-Otalorak egiten daben Jabi Jaioren erretratu hunkitua.

Emiliano Lopez Atxurra Petronorreko presidenteak eta On Mario Izeta Bilboko gotzain administratzailea postolikoak lankidetza-hitzarmena sinatu dabe gaur energia garbien inguruko ikerkuntza-egitarauak aberasteko eta energia horren ezarpena sustatzeko, sortzaile eta kontsumitzaile lez, eta hartu-emonak areagotzeko eta zabaltzeko. Hitzarmenak hiru urteko iraupena dau eta beronen bidez erakunde biek batera jardungo dabe CO2 isurketen murrikzeta eta trantsizio energetikoa bideratzeko. Derioko ‘Seminarioa’ eraikinaren teilatuan, eraikinak barne hartzen dituan 60 enpresentzako energia %100 garbia sortuko daben eguzki-plaka fotovoltaikoak jarriko dabez.

Juan Mari Bautista eleizbarrutiko abadeak hainbat urte daroaz Ekuadorren misiolari lez. Lehenengo aldian, 1995tik, Vincesen egon zan eta gero Mocaches, biak Babahoyo-Los Rioseko eleizbarrutian. Beste hamar urte inguru Bilbon igaro ondoren, Xabierko San Frantzisko parrokian –bertan hilaren azken domekaz ospatzen dan meza latinoamerikarraren sustatzaileetako bat izan zan-, Ekuadorrera itzuli zan 2014an, oraingoan ‘Monte Sinaí’ parrokiara, eta hantxe dago gaur egun be. Parrokia hau Guayaseko eleizbarrutian dago, Guayaquil uriko auzo pobre batean. Handik, Bautistak gutuna bialdu dau Misinoetarako Eleizbarrutiko Ordezkaritzara, jasotako laguntzagaitik eskerrak emonez eta egoera hau zelan bizi daben kontatuz (gutuna osorik, esteka honetan).

Juan Ramon Etxebarria misiolari arabarra Kuartangon egoanean eta ikastolako mutiko eta neskatoek Ekuadorreko San Isidroko neskato-mutikoekin gutunak trukatzen ebezanean bururatu jakon liburua egitea. Juan Ramonek urtearen hasieran “ Alkarren Barri – Comunicación” eleizbarrutiko aldizkariari eskaini eutsan alkarrizketan azaldu ebanez, “hunkigarria zan hemengo umeek hango gauzen aurrean eben jarrera”. Alkarrizketa horretan inoanez, umeek nabarmentzen daben baliorik garrantzitsuenetakoa familia da: “hori ondo islatzen da liburuko erantzunetan eta hango umeengan beste gauza bat be argi eta garbi ikusi daiteke: partaide-sena, euren lurrari eta euren aitite-amamei estu lotuta sentitzen dira, ume gehienek maitasuna deutse aitite-amamei. Lotura estua eta sinestezina dabe lurragaz, kulturagaz, jolas tradizionalakaz. Guzti hori garrantzitsu iruditu jaku eta liburuan islatuta geratzen da”.

Juan Maria Aburto alkateak guztiz hunkituta jaso dau Ohorezko Erromes izendapena gaur. Begoñako amaren magalean bizitzako une gozo asko bizi izan dauazala gogoratu dau. Bertan bateatu zan eta bere ezkontzaren 25. urteurrena be bertan ospatu eban. Amatxuri argia eskatu deutsa gizarte hobea egiten laguntzeko. Bilbotarren zerbitzura jarri da barriro eta Kalkutako Ama Teresaren berba batzuk aitatu dauz amaitzeko. On Joseba Segura gotzain laguntzaileak berba batzuk eskaini deutsoz alkateari adorea emonaz sarritan hain zanpatuta dagoan politikoen lana balioan jarrita.

Argazkietan, joan dan domekaz, urriak 11, ospatu zan Begoñako Andra Mariaren egunez basilikan bizi izan ziran uneetako batzuk jasoten dira. Pandemiaren eraginez, egun berezia izan da eta ezohiko eran egin dira ospakizunak: jente-kopuru mugatua Eukaristietan; On Mario Izeta gotzainaren azken ospakizuna Amatxuren egunez Burgoseko Artzapezpiku lez aldi barriari ekin aurretik; Erromeria barik; Joan Mari Aburto Bilboko Alkatea Ohorezko Erromes lez… Ehunka lagunek online egin eban bat ospakizunakaz web orrialde honetan, eleizbarrutiko irratietan (Herri Irratia eta Bizkaia Irratia) edo Telebilbao lako kanaletan (hemen Meza Nagusia emon eben zuzenean).

Gaur, urriak 13, Basauriko kristau alkarteak San Fausto Martiriaren eguna ospatuko dau eguerdiko 12:00etan San Pedro eleizan ospatuko dan Eukaristiagaz. Bihar be, eguaztena, Eukaristia eguerdian izango da Arizeko alkarteko zanindaria dan San Fausto Laborari eta Edurretako Ama eleizan.

2019.eko urrian joan zan Etiopiara Ramon Diaz-Guardamino Bilboko Eleizbarrutiko abadea. Urtebetez uriburuan amharera ikasten egon ondoren, orain bikariotzan txertatuko da eta parrokia batean jardungo dau bertako parroko bategaz. Etiopiako Somali probintzian dagoan eta parrokiako bikario lez jardungo dauan Jijigatik Ramonek azaltzen dauanez, “jakina, asko ikasi behar dot oraindik amharera menderatzeko”.

Larogeta hamaika urtegaz, “botak jantzita hil zan” atzo, “Jesus Solidarioa” alkartean ospatu eben Eukaristian adierazo ebenez. Hain zuzen be, San Salvadorreko Artxidiozesian dagoan alkarte horretan emon ditu azken hogeta bost urteak, hango jenteagaz bizia eta fedea konpartituz. Orion jaio zan eta umetatik gura izan eban erlijioso izatea. 1950ean egin eban botoa anai marista lez. Vatikano II.a Kontzilioagaz, bizitzan biraketa esaguratsua egin eta abade ordenatu zan 71 urte ebazala, “gizarte lana egiteko eta txiroakaz egoteko”. Bere misiolari senak bultzatuta, gizarte ekintza sustatu eban eta ‘Círculo Solidario’ GKEa sortu eta honen bidez lan handiak egin izan dira landa-eremu behartsuetan: errepideak, ur-instalazinoak, e.a. El Salvadorrera heldu zanetik, bitarteko urriak dabezan gazteen heziketan jardun izan dau. Euren alkartean hartzen dabez eta bekak emoten deutsez unibertsitatean ikasi daien. Idazle oparoa izan da, 20 liburutik gora idatzi ditu eta Ebanjelioaren azalpenak bialtzen eutsezan gura eben guztiei. Goian bego! Hain zuzen be, Domun egunaren astean hil da Patxi Loidi sen misiolaria umetatik bizi izan dauan gizona. Patxi Loidik “Alkarren Barri – Comunicación” eleizbarrutiko aldizkariari 2019an eskaini eutsan alkarrizketan adierazo ebanez, berak misiolari lez eban asmoa “kristau bokazino helduak garatzea” zan. “Lider izateko gaitasuna” daben kristauak hezi behar zirala inoan, eta ez “lider kristauak” . Fedean hezi nahi ebazan “emakume eta gizaon gazteak; Ebanjelioa benetan aintzat hartu daiela eta herri zein Eleizan benetan bizi daiela”. Langile nekaezina, “umoretsu eta gogotsu” jarraitzen eban 90 urtegaz be, “otoitz egiten denpora asko” emonez, lanak izten eutsanean. Asko maite izan dabe gizon hau eta horren erakusle dira Facebookeko bere perfilean eskaintzen deutsezan mezuak edo Artxidiozesian bertan agertu dabezan sentimentuak. “Gaur, Patxi maitea, Sortzailearen besoetara itzuli zara, eta buruz buru zagoz hainbestetan agertzera emon deuskuzun Haregaz; zuri esker, Aita Jainkoa era guztietako behartsuenengan ikusten ikasi genduan. Eskerrik asko gure aberriari erakutsi deutsazun alkartasunagaitik, atzerritar izanda, zeure egin zenduan-eta El Salvador… Gaur, zurekin bizi izandako une ederrak eta gutako bakotxagaz izan zenduzan solasaldi mamintsuak. Villa Madrik, El botoncillal, Las Marías alkarteen eta nire izenean, eskerrik asko bestelako mundua egiten ahalegintzeagaitik eta guztion bizitzan arrastoa izteagaitik”, idatzi dau Amelia Orantes de Duranek. Bere oroimenezko Eukaristia El Salvadorren Gaur –urriak 16, barikua- Jesus Solidario alkarteak Patxi Loidiren oroimenezko meza ospatuko dau arratsaldeko seietan, El Salvadorreko Santos Niños Inocentes parrokian.

‘Bizian gora – Vida ascendente’ nagusien mobimentuak kurtsoari hasiera emon deutso gaur, eguerdiko 12:00etan Bilboko San Nikolas eleizan ospatu daben Eukaristiagaz. Mezaren aurretik, Juan Angel Axpe kontsiliarioak eta Tomy Rodriguez mobimentuko eleizbarrutiko presidenteak hitz batzuk zuzendu deutsiez bertaratutakoei.