Bihar, irailak 18, Karrantza bailarako zaindaria dan ‘ Virgen del Buen Suceso’ dalakoaren eguna ospatuko da. Jai ospetsua eta entzutetsua da Enkarterri inguruan eta makina bat lagun batu ohi da ospakizunean. Ezohiko urte honetan, Eukaristia batetik bestera ordu eta erdiko tartea itziko dabe. Goizeko 8:00etan ospatuko da eguneko lehenengo meza eta gotzaina buru dala eguerdiko 12:30etan ospatuko dan Meza Nagusia kanpoan ospatuko da, eleiza oso txikia dalako.

Jente barik, osasun egoerak eskatzen dituan segurtasun-neurriak betez, irailean, txapelketa hasita eta ez abuztuan, ohikoa danez, Athletic Club taldea Begoñako Basilikara hurreratu da Amatxuri eskaintza egitera. Gizonezkoen eta emakumezkoen taldeetako hainbat kide, Aitor Elizegi presidentea eta Gaizka Garitano eta Angel Villacampa entrenatzaileak izan dira taldean eta Jose Luis Achotegui abadeak egin deutse harrera.

Joan dan eguenez, irailak 7, Carmelo Ibarra Sarrionandia-Ibarra eleizbarrutiko abadea hil zan Bilbon 87 urteko zala. Bere arimaren aldeko hileta-eleizkizuna etzi, irailak 21, ospatuko da Begoñako basilikan , umetan Errekaldeko parrokian Carmelo Ibarraren akolito izan zan On Joseba Segura Eleizbarrutiko gotzain laguntzailea buru dala.

Ohiko baldintzetan, gaurko egunez emongo eutsen hasiera Mesedetako Amaren asteari, irailaren 24aren inguruko egunetan ospatzen da-eta kartzelan dagozan pertsonen zaindarian dan Amaren eguna. Basauriko kartzelan, hain zuzen be, hainbat jarduera ospatu izan da aste horretan, baina aurton, Covid-19a dala-eta osasun egoerak eragindako murrizketak dirala-eta, bertan behera geratzen da Mesedetako Amaren astea. Kartzela Pastoraltzako arduradunek azaltzen dabenez, ez dabe baimenik jaso kartzelan ekitaldi bakar bat be egiteko eta ekitaldi bakarra , On Joseba Segura gotzain laguntzailea buru dala ospatuko dan Eukaristia izango da. Kanpoko inork ezingo dau parte hartu ospakizunean, gotzainari lagunduko deutsan Jorge Muriel pastoraltzako arduraduna izan ezik.

Joan dan asteburuan, antzinako musika protagonista daben “ Ziortzako kontzertuak ” dalakoen lehenengoa ospatu zan. Ekitaldi berezia da aurtengoa, hain zuzen be bizi dogun osasun egoeraren ondorioz ezarritako segurtasun-neurriek baldintzatuta dagoana. Gaur eta biharko emonaldietan, beraz, jente-kopuru mugatua izango da eta emonaldiak on-line be eskainiko dira, baina, ohikoa danez, musikariak bikainak dira eta autobusak jarriko dira Bilbotik Ziortzara joateko. Beste alde batetik ‘Bilbao hiria’ organo-jaialdiaren barruan, Valentin Fheodoroff Vienako Beethoven Nazinoarteko lehiaketako irabazleak jardungo dau gaur arratsaldeko 20:00etan, Begoñako basilikan.

Datorren domekan –irailak 20-, Oiz-Anboto Pastoral Barrutian Lehenengo Jaunartzeak ospatzen hasiko dira. Egun horretan, Mallabiko neska-mutikoek egingo dabe eta hurrengo domeketan Elorrio, Zaldibar eta Berrizkoen txanda izango da. Azkenak, hain zuzen be urriaren 11n, Ermuan izango dira. Aurton bada barritasun bat, izan be, Pastoral Barrutian maskara homologatuak prestatu dabez neska-mutiko eta katekistentzat “danak bardin joan daitezan”. Ermuan, ohikoa dabenez, tunikaz jantzita egingo dabe.

Atzo –irailak 17, eguena- hil zan Bilbon Anastasio Azkarai Bilbao eleizbarrutiko abadea, 90 urteko zala. Bere arimaren aldeko hileta-eleizkizuna bihar – irailak 19, zapatua- ospatuko da, arratsaldeko zazpietan Igorreko parrokian eta Felix Alonso Eleizbarrutiko bikario nagusia buru dala.

Sasoi batean, zurak harriak edo adreiluak besteko kalidaderik ez ebala uste zan eta, horregaitik, gotzainen nahia izaten zan eleizen gangak harrizkoak edo adreiluzkoak izatea. Halanda be, bada Bizkaian dozena inguru eleiza non zurginek egundoko kalidadeko lanak egin ebezan. Ibilbideari hasiera emoteko, osagairik zaharrena dauan lekura joko dogu, hain zuzen be, 1520an eraiki zan Orozkoko Olarteko San Bartolome eleizara. Herri bereko Goikuriako Jaunaren jaiotza ermita be eraikin aitagarria da. Arratian, Zeanuriko Ozerinmendiko ermitaren gangak arku markatuak eta zizelkatutako giltzarriak ditu. Durangaldean, Mañaria eta Zaldibarreko eleizak dagoz., Markinan hiru eleiza zoragarri eta, azkenik, Ibarrangelun, San Andres eleiza, euskal artearen ‘Kapera Sixtinoa” lez ezagutzen dana.

Azken urteotan ohikoa danez, Bizkaiko hainbat herritatik etorriko jentea batuko da Bilboko Eleizbarrutiak kurtsoari hasiera emoteko egingo dauan ekitaldian. Osasun krisialdiak eragindako egoera dala-eta, segurtasun-neurriak betez egingo da ‘Goazen 2020’ jarduera La Casilla pabiloian, besteak beste, jente-kopuru mugatuagaz, hain zuzen be 250 partaidegaz. Bertaratutako guztiek aldez aurretik egin behar izan dabe izen-emotea, nortasun-agiria erakutsi beharko dabe sarreran eta harmailetan jarriko dira lagun arteko nahitaezko tartea betez. On Mario Izeta gotzaina eta On Joseba Segura gotzain laguntzailea izango dira ekitaldian eta eleiz esperientzia eta ibilbide esanguratsua daben lagun bik esku-hartuko dabe. Hezkuntza beharrizan bereziak dabezan (SAT) Otxarkoaga ikastegiko gazteek osatzen daben ‘Percussion Confussion’ taldeak girotuko dau baterako topaketa hau. Ekitaldia zuzenean emongo da web orrialde honetan.

Gaur hasten da Zeinu-hizkuntzaren Nazinoarteko Astea. Aurton, indarrean dagozan osasun baldintzen eraginez jardueren egutegia murriztu egin dabe. Dana dala, gure Eleizbarrutian pastoraltza hau bizi-bizi dago eta partaideek etzi La Casilla pabiloian ospatuko dan ‘Goazen’ kurtso hasierako ekitaldian parte hartuko dabe era telematikoan. Aitatutako jarduera hori arratsaldeko seietan hasiko da eta zuzenean jarraitu ahal izango da on-line www.bizkeliza.org eleizbarrutiko web orrialdean.