Gaur goizean Bizkaiko Eleizeak VII. Bake Topaketa ospatu dau bizi dogun osasun egoerara egokituta. Elizbarrutiko herri batzuetan beharrezkoak diran neurriak zainduz, taldeka batu dira egunerako beren beregi prestau dan bideoa ikusteko. Durango, Elorrio, Astrabudua, Bilbo eta Sestao izan dira topalekuak. Gainontzean ehun bat lagun batu dira online hausnarketarako jardunaldian parte hartzeko. Belaunaldi ugaritako jentea batu da eta aukerea egon da Lourdes Oñederraren eta terrorismoaren biktimak izan diran familiarteko batzuren testigantzak entzuteko. On Joseba Segura gotzain administratzaileak emon deutso ondo etorria ekitaldiari eta honetan, gogoan hartu dau 2020ko azaroan hildako Angel Mari Unzueta, topaketa honeetako bultzatzaile sutsua. Titular ugari itxi dauz gaurko ekitaldiak parte hartu dabenen artean eta bata goiburuan batu dan hau da: "Bizkaiko Eleizeak ez dau gura memoriaren karpeta itxi". Gaurko egun honegaz batera azken hamarkadan Bilboko Elizbarrutian arlo honetan egin diran ekimenak batzen dauazan dossierra aurkeztu da.

Gaur, bake eta adiskidetzearen aldeko topaketaren zazpigarren ekitaldia ospatzen dan egunean, azken hamarkadan, Blboko Eleizbarrutian gai honen inguruan garatu izan dan hainbat jardueraren bideo eta argazkiak batzen dituan agerkaria aurkeztu dau komunikabideetarako sailak, jakin-mina daben pertsona guztientzat eskuragarri. Agerkari honetan jasoten diran ekimen guztiak eleizbarrutiko aldizkarian jaso ziran bere egunean. Horreetakoren bat, gainera, esate baterako On Joan Maria Uriarte eta On Mario Izeta gotzainen arteko solasaldia, joan dan azaroan hil zan Angel Mari Unzueta bikario nagusi ohiak zuzendu ebana, beren-beregi ‘Alkarren Barri – Comunicación’ aldizkarirako prestatu zan. Bildumaren atzeko azalean, Unzueta lez, Elizbarrutian “adiskidetzerako bitartekari” izan diran pertsona guztien lana autortzen da.

Alkarteetan batuz eta era telematikoan ospatuko dan 2021eko Bake Topaketa, On Luis Arguello gotzainak abade eta diakonoei eskaini deutsen berbaldia eta Garizuma aldiaren hasiera agertu dira, besteak beste, web orrialdean. Honeek eta beste barri batzuk ikusteko: www.bizkeliza.org

Irudian klik eginez, Bake Topaketaren VII. ekitaldian bakarka zein taldean parte hartuko dozu. Bideoan, indarkeriaren oroimena belaunaldi gazteei helarazteko bideak lantzeko formatuari eta jardunbideari buruzko gorabehera guztiak aurkituko dozuz.

Agerkari multimedia hemen

Datorren bariku eta zapatuz –otsailak 26 eta 27-, “Katolikoak eta bizitza publikoa” XV. Jardunaldiak ospatuko dira Euskal Herrian, Propagandisten Alkarte Katolikoak (PAK) antolatuta. On Joseba Segura Eleizbarrutiko gotzain administratzaileak sarrera egingo deutse jardunaldiei hasierako ekitaldian. Oraingoan, hezkuntza arloko erreferenteakaz batera egingo dabe hausnarketa, “heziketak axola daualako”. Pandemia dala-eta, berbaldiak online izango dira eta sarrera libreagaz. Gehiago jakiteko eta izena emoteko: hemen .

Galdakao Pastoral Barrutiak (PB), eta batez be Osasun Pastoraltzako emakumeek eta “Argizai” eskaut taldeko gazteek osatzen daben Mozambikeren laguntzarako taldeak , Basauriko San Miguel parrokiako taldeakaz batera, hainbat jarduera egin dabe azken urteetan eta horrei esker 50.000 batu dabez Mozambikeko Lalauako Mirreren alkarte eskola eraikitzeko. Pobretasunaren aurkako azken jardunaldi bien ostean, PBko lehentasunezko ekintzatzat hartu da honako jarduera hau.

Gaur, otsailak 22, “Adiskide eta senide. Comunidades acogedoras” Garizuma aldiko kanpainaren barruan eskainiko diran hiru berbaldi birtualen artean lehenengoa eskaintzen da. Imanol Zubero soziologo eta Euskal Herriko Unibertsitateko (UPV/EHU) irakasleak nabarmentzen dauanez, ezinbestekoa da alkarte abegitsu izatea eta hori lortzeko hainbat aukera eskaintzen dau. Alkartean batasuna nagusituko da eta, horrezaz gainera, alkarte barneratzaile izan behar dau, hori da funtsezkoa. Zuberok bere ikuspuntutik “funtsezkoa” dan arazoa azpimarratzen dau, hau da, “gizarte alderdia gauzatu, sentotu eta dastatu” ahal izateko baldintza gero eta eskasagoak doguzala. Berbaldia osorik entzuteko, irudian klik egin edo eleizbarrutiaren youtube kanalera jo zeinke. Berbaldia eta materialak hemen: https://zuzenean.bizkeliza.net/comunidadesacogedoras/charlas-cuaresmales/

Imanol Zuberoren berbaldia eta materialak hemen

Datorren zapatuz, otsailak 27, Guillermo Rovirosaren heriotzaren 57. urteurrena eta Tomas Malagonen heriotzaren 37. urteurrena ospatuko da. Guillermo Rovirosa laikoa (1897-1964) izan zan HOAC mobimentuko lehenengo militantea eta gaur egun dohatsu autortzeko prozesuan dago. Bere aldetik, Tomas Malagon abadea (1917-1984), kontsiliario nagusi izan zan eta biek jardun eben langileen eta lan eremuaren ebanjelizazinoaren zerbitzura. Aurton bere sorreraren 75. urteurrena ospatzen dauan HOAC mobimentuak bi pertsona honeen bizitzak gogoratu eta esker oneko Eukaristia ospatuko dau datorren zapatuz, arratsaldeko zazpietan, Santiago katedralean, On Joseba Segura Eleizbarrutiko gotzain administratzailea buru dala. Eleizkizuna web orrialde honen bidez jarraitzeko aukera dago.