Asteburu honetan, askotariko jarduera eta ospakizunak izan dira Eleizbarrutian, besteak beste: “Gizalegezko lanaren alde” kanpainari lotutako ibilaldia eta bilkura Bilbon eta Sestaon; Lehenengo Jaunartzeak hainbat Pastoral Barrutitan; Diakonoen Eleizbarrutiko Eguna; Begoñako Andra Mariaren bederatziurrenaren hasiera eta afrikar alkartearen hileroko meza San Anton parrokian.

Urriaren 7an ospatuko dogun Gizalegezko Lanaren aldeko Munduko eguna.

“Jainkoaren familiaren zerbitzari” goiburuaren haritik, bihar –urriak 4, domeka-, Asisko San Frantziskoren egunez, diakonoen eguna ospatuko da gure Eleizbarrutian. Bizkaian, ministerio ordenatu honi dagokionez, 9 diakono dagoz, 3 hautagai eta hautagai izan daitekezan beste bost lagun. Bihar, diakonoak eta euren familiak On Joseba Segura gotzain laguntzaileagaz alkartuko dira eta Eukaristia ospatuko dabe Begoñako Gogarte Etxean, 19:00etan.

Atzo, Begoñako kofradiak aurtengo Ohorezko Erromesa aurkeztu eban: Juan Maria Aburto B ilboko alkatea. Osasun-krisia dala-eta, aurtengo erromeria basilika barruan ospatuko da. Ekitaldi “neurritsu eta sendoa” izango da, Javier Diago kofradiako presidenteordeak atzo adierazi ebanez. Alkatea hunkituta agertu zan eta izendapen hau betirako gordeko dauala “oroimenean” eta “bizitzan” esan eban.

Bilboko Eleizbarrutia sortu zala 70 urte bete dirala-eta, Komunikabideetarako Eleizbarrutiko sailak, Bizkaiko Eleizaren Historia Artxiboagaz (AHEB-BEHA) batera, eleizbarrutiaren historiari buruzko zazpigarren kapitulua argitaratu dau, beste behin be, Angel Mari Unzueta bikario nagusi ohiaren gidoi eta aurkezpenagaz. ‘ Alkarren Barri – Comunicación ’ eleizbarrutiko aldizkariaren azken alearen bertsino digitalagaz batera zabaldu dan bideoan milurteko barriko hainbat gertaera garrantzitsuren barri emoten da, besteak beste: Santiago katedrala barriro zabaldu izana, zaharbarritu ostean; ekipo ministerialek kudeatutako Pastoral Barrutien eraketa; lehenengo beatifikazinoa Bilbon; On Mario Izeta gotzain laguntzaile izendatu izana; bakearen aldeko ekitaldia Armentian edo Eleizbarrutiko Alkartasun Zeinuak.

Eleiz Museoaren, Eleizbarrutiko Artxiboaren eta Labayru Fundazinoaren eskutik ‘Alkarren Barri – Comunicación’ aldizkarian argitaratu genduzan eta orain berreskuratzen dihardugun ibilbideei dagokienez, azkenera heldu gara. Gaur bizkaitarrek debozino gehien deutsen –Eleiz Museoan eurei buruz asko galdetzen dabelako, besteak beste- santu eta santak dagozan lekuetara joko dogu. Fatimako Ama Birjinaren irudia dagoan lekuetan hasiko da ibilbidea: Durango, Bermeo, Lemoa, Areeta, Gordexola, karrantza eta Enekuri. Santa Ritaren inguruan be jakin-min handia izaten dau jenteak, eta honen irudia San Jose de la Montaña eleizan (Bilbao), Olabeagan (Turtzioz) eta Bermeon aurkituko dogu. Gero, San Kristobalen, San Ramonen, San Mamesen, San Judas Tadeoren bila joango gara. Badakizu non dagozan euren irudiak?

Aurton, urriaren 11ko ospakizuna –eta beste hainbeste ospakizun-, desbardina izango da. Goizeko zortzietatik aurrera ospatuko diran eguneko mezaren batean parte hartu gura daben fededunek lekua hartu behar dabe parrokiara deituz. Bihar arratsaldez amaituko da izena emoteko epea. Leku gitxi batzuk dagoz Burgoseko artzapezpiku izendatu barri daben On Mario Izeta gotzaina buru dala eguerdiko hamabietan ospatuko dan Meza Nagusirako. Basilikara bertara joaterik ez dabenek, Eukaristia guztiak zuzenean jarraitu ahal izango dabez web orrialde honetatik, Gotzaitegiaren eta Euskaltelen arteko lankidetzari esker. Telebilbaok be eguerdiko Meza Nagusia zuzenean emongo dau bere kanalean eta eleizbarrutiko irratiek Eukaristia bi emongo dabez: Bizkaia Irratiak goizeko 10:00etan, euskeraz, eta Herri Irratiak, eguerdiko 12:00etakoa, OMtik.

Atzo –urriak 6, martitzena-, On Mario Izeta gotzaina Burgoseko Artxidiozesiko Artzapezpiku izatera daroan izendapena argitaratu zan. On Mario Izeta gotzainak abenduaren 5ean ekingo deutso bere ministerioari aitatutako Artxidiozesian, Burgoseko katedralean egingo dan eleizkizunean. Oraintsu bete dira hamar urte Bilboko gotzain izendatu ebenetik. 2010.eko abuztuaren 24an, Frantzisko Aita Santuak kargu horretarako izendatu eban eta 2020.eko urriaren 11n , Begoñako Andra Mari Bizkaiko zaindariaren egunez, karguaz jabetu zan Bilboko Santiago katedralean egin zan ospakizunean. Hain zuzen be, datorren domekaz, urriak 11, 10 urte beteko karguaz jabetu zanetik. On Mario Izeta gotzaina izango da buru Andra Mariaren egunean Begoñako basilikan ospatuko dan Meza Nagusian (eguerdiko hamabietan) eta bezperako Mezan (arratsaldeko zazpietan). Aitatutako Eukaristia bi horreek eta Amatxuren omenez domekan egingo diran gainerako guztiak zuzenean emongo dira eleizbarrutiko web honen bitartez.

Seve Calleja idazleak ‘ Memoria Argitaraezinak – Memorias Impublicables’ liburua aurkeztuko dau datorren zapatuz, urriak 10, arratsaldeko seietan, Bilboko liburu-azokan. On Pablo Bilbao Aristegui Eleizbarrutiko abadearen artikulu laburrak jasoten dira liburuan. Ezagutu eban eta bere adiskidetasunaz “gozatu” eban Sebas Garcia Trujilloren esanetan, abade “polifazetiko eta berezia” izan zan. Bere eragina antzeman zan Bilboko eztabaida-leku erlijioso eta kulturaletan XX. gizaldian zehar.

Bizkaiko Foru Aldundiak antolatzen dituan Ondarearen Europar Jardunaldiak urrian ospatzen dira. Gaur, urriak 7, aurtengo ekitaldirako prestatu daben egitarau zabalaren barruan, Bilboko arkitektura klasizista bisitatzeko aukera emoten dabe, zehatz-mehatz, San Anton eleizara bisitaldia egitekoa. Ibilbide gidatu hau arratsaldeko 17:30etatik 19:00etara egingo da. Beste aukera batzuetan lez, eleizbarrutiko hainbat erakundek parte hartzen dihardu jardunaldietan, esate baterako, Bizkaiko Eleizaren Historia Artxiboak (AHEB-BEHA) eta Labayru Fundazinoak. Aurtengo gaia hezkuntza da eta, horregaitik, eleizbarrutiko hainbat ikastetxek eta kongregazino erlijiosok bat egin dabe jarduera honegaz.