Barria - www.bizkeliza.org
Skip to main content

Otoitzaldia Sestaon, HOACen 75. urteurreneko ekitaldiei hasiera emoteko

created by Gaur arratsaldeko 19:00etan, Andra Mari parrokian |
|   Komunikazinoa

1946.eko azaroaren 3an, gerraoste betean, Ekintza Katolikoko Langile Ermandadea (HOAC) mobimentua sortu zan eta hori dala-eta, 2021ean 75. urteurren hori ospatzeko hainbat ekitaldi egingo da. Gure Eleizbarrutian, Sestaoko Andra Mari parrokian arratsaldeko zazpietan egingo dan otoitzaldiak emongo deutso hasiera ospakizunari. Ondoren, arduradunek azaldu dabenez, zeinu publikoa egingo da Kasko plazan langileriari eskainita dagoan monumentuaren inguruan, “Guillermo Rovirosaren eskutik martxan jarri zan eta gaur egun be zentzuz beteta dagoan HOAC mobimentuaren bategite-bokazinoa sinbolizatzeko”. HOAC mobimentuaren Bizkaiko ordezkaritzak hainbat jarduera egingo dau urteurren honen inguruan eta unean-unean emongo dau guzti horren barri.

HOACen Bizkaiko ordezkariek, beraz, oroitu eta esker ona adierazo gura dau: “hainbeste militante, laiko eta abaderen eskaintza eta eskuzabaltasuna, ahalegin handia egin dabelako Barri Ona langileengana eroateko eta gizon eta emakume langileen handitasun eta duintasunaren alde egiteko. Horregaitik, laneko baldintza duinen autorpena jokoan egoan lekuetan egon dira eta soldata duinak aldarrikatu dabez norbanako eta familiak duintasunez bizi eitezan”. HOAC mobimentuko kideek dinoenez, atzo zein gaur, lanaren eremua ebanjelizatzeko “ezinbestekoak dira apostolu langileak, Jesukristoren lekukoak, langileen eta lanaren eremuan txertatuta dagozan pertsona eta erakundeak. Espiritualtasuna, heziketa eta konpromisoa dira mobimentuaren hiru zutabe nagusiak eta Eleiza langileen eta lanaren eremuagaz buztartzea, helburu nagusia”.

 

 

Kasko plaza