Barria - www.bizkeliza.org
Skip to main content

Ekumenismorako ordezkariak aniztasun erlijiosoari buruzko ekitaldian parte hartuko dau zapatuz

created by Online formatuan |
|   Komunikazinoa

Datorren zapatuz, urtarrilak 30, Miguel Angel Esnaola ekumenismorako eleizbarrutiko ordezkariak “Erlejinoak eta bakearen sustapena” gaiari buruzko ekitaldian parte hartuko dau, 10:00etatik 13:00era.Novisi alkartearen eskutik egingo da, Bake eta Adiskidetzerako Eusko Jaurlaritzako Idazkaritza Nagusiaren laguntzagaz. Hasieran, “Prometra alkarteko presidente dan Damuel Lonlon Creppyk jardungo dau, “Afrikako erlejinoen eta jarduera tradizionalak, bake eta bizikidetzaren eraketarako tresna” gaiaren inguruan. Esnaolak “Kristau erlejinoak, bakerako eta Giza Eskubideen sustapenerako bidea” gaia jorratuko dau goizeko hamaiketan eta, amaitzeko Moufdi Karmel EHUn zientzietan doktore danak “erlejino islamikoa, bakerako, bizikidetzarako eta Giza Eskubideetarako bidea” dalakoaren inguruko hausnarketak egingo ditu, 12:00etatik 13:00era. Ondoren, eztabaidan jardun ahal izango da aurkeztutako gaien inguruan. Parte hartu gura dauanak aldez aurretik izena emon beharko dau novisielkartea@outlook.es helbide elektronikoan edo 631 24 52 WhatsAppean.

Esnaolak azaltzen dauanez, kristautasunak bakerako eta Giza Eskubideen sustapenerako bidean egin dauan ekarpenaren inguruan jardungo dau. “Zorionekoak bakearen alde lan egiten dabenak, eurei Jainkoaren seme-alaba esango jake-eta” (Mateo 5, 9). Mendiko Sermoian esandako zoriontasun hau Nazareteko Jesusen mezuaren bihotzean dago. Jesusen atzetik jarraitu gura dabenentzat, “Jainkoaren erreinua eta bere zuzentasuna” iragartea, egitasmo espirituala izateaz gainea, “txarkeriari maitasunez aurre egitea da. Bakearen eta Giza Eskubideen alde lan egitea, bokazino, erronka eta pribilegio da kristauarentzat”.

Ekumenismorako ordezkariaren esanetan, Frantzisko Aita Santuak makina bat bider gogoratzen dau gizon eta emakume guztiok duintasun bereko egiten gaituen Giza Eskubideen Adierazpen Unibertsala: “bakotxak, ausardia eta erabagiz, dagokion egitekoaren berezitasunean, gizon eta emakume bakotxaren –eta batez be ikusezinen, hau da, gose eta egarri diranen, biluzik, gaixo dagozanen, atzerritarren, atxilotuen, gizartearen kanpoaldeetan bizi diranen, baztertuen- funtsezko eskubideak errespetatu behar ditu” (Giza Eskubideei buruzko Nazinoarteko Biltzarraren mezua, 2020.12.10). Miguel Angelen esanetan, “ikuspuntu ekumenikotik, honek gorputz bera izatera eroango gindukez”.